اقتوبەدە كەپىلدە بولعان قاريانىڭ قىزى پوليتسيانى ايىپتادى

فوتو: اشىق دەرەككوز

اقتوبەدە قورادا كەپىلگە الىنىپ, اياۋسىز ولتىرىلگەن قارتتىڭ قىزىمىن دەگەن ەلەونورا الي اتتى جەلى قولدانۋشىسىنىڭ حابارلاماسى تارادى. پوليتسيا ونىڭ ءسوزىن جوققا شىعارىپ وتىر, دەپ حابارلايدى qandastar.kz

ەلەونورا اليدىڭ جازۋىنشا, پوليتسيا 5 ساعات بويى كۇدىكتىمەن سويلەسىپ, كەلىسىمگە كەلە الماي تۇرعان كەزدە, ونىڭ 75 جاستاعى اكەسى ءومىر مەن ءولىمنىڭ اراسىندا جانتالاسىپ جاتقان.

«مەن قايتىس بولعان كىسىنىڭ قىزىمىن… وقيعا بولعان كۇنى پوليتسياعا كەشكى ساعات 19.38-دە حابار بەرىلدى. پوليتسيا تۇنگى ساعات 01.00-دە ۇيگە باسىپ كىردى. ونىمەن 5 ساعات بويى سويلەسكەن. شەشەسى كۇندىز قازا بولعان, ال مەنىڭ اكەم كلينيكالىق ءولىم جاعدايىندا جاتتى. ەگەر پوليتسيا كەلگەن بويدا شارا قابىلداعاندا اكەم ءتىرى قالاتىن ەدى… ەگەر پوليتسيا كەلە سالا كۇدىكتىنى ۇستاۋ ءۇشىن ۇيگە باسىپ كىرگەندە, اكەمنىڭ ءومىرىن قۇتقارۋعا بولاتىن ەدى…» – دەپ جازدى جەلى قولدانۋشىسى.

اقتوبە وبلىسىنىڭ پوليتسيا دەپارتامەنتىنىڭ ءباسپاسوز قىزمەتى حابارلامانى تەرىسكە شىعاردى.

«بۇل اقپارات شىندىققا جاناسپايدى. رەسمي اقپاراتقا سەنۋىڭىزدى سۇرايمىز», – دەپ جاۋاپ بەردى پوليتسيادان.

وسىعان دەيىنگى رەسمي حابارلامادا پوليتسيانىڭ كۇدىكتىمەن 3 ساعات كەلىسسوز جۇرگىزگەنى, كۇدىكتى كەپىلگە العان ادامدى بوساتۋ تۋرالى تالاپتاردى ورىنداۋدان باس تارتقان سوڭ ۇيگە باسىپ كىرۋ تۋرالى شەشىم قابىلدانعانى ايتىلعان بولاتىن.

ەسكە سالايىق, ءبىر اپتا بۇرىن اقتوبەدە 40 جاستاعى ەر ادام ماسكەۋ اۋدانىندا ورنالاسقان ۇيگە كىرىپ, تانىس ايەل مەن ونىڭ اناسىن جانە وگەي اكەسىن كەپىلگە العان. ول ۇيگە كىرە سالا, ايەلدەن باستاپ, ونىڭ زەينەتكەر اكە-شەشەسىن اياۋسىز ۇرىپ-سوققان. ەسىك-تەرەزەنى جاۋىپ, 75 جاستاعى قارت پەن 67 جاستاعى اجەيدى پىشاقتاپ, قوراعا قاماپ تاستاعان. اجەي سول جەردە قازا تاپسا, قاريا اۋرۋحاناعا جەتكەن سوڭ ءجانتاسىلىم ەتتى. بۇگىن قازا بولعان كىسىلەردىڭ قىزى اۋرۋحانادان شىقتى.