اقتوبەدە پىشاق جاراقاتىن العان وقۋشى جانساقتاۋ بولىمىندە جاتىر

فوتو: اشىق دەرەككوز

اقتوبەدە پىشاق جاراقاتىن العان وقۋشى جانساقتاۋ بولىمىندە جاتىر. ونى تەلەفونىن بەرمەگەنى ءۇشىن قاتارلاستارى پىشاقتاپ تاستاعان, دەپ حابارلادى qandastar.kz كتك ارناسىنا سىلتەمە جاساپ.

 «سانىنىڭ تومەنگى ۇشتەن ءبىر بولىگى جاراقاتتانعان. تامىرعا زاقىم كەلمەگەن. جاناما بەتكەي تامىرلارى زاقىمدالعان. تۇسكەن كەزدە وتا بولىمىندە العاشقى وڭدەۋ جاسالىپ, جاراقاتىنا تىگىس سالىندى. ايتۋىنشا, تانىمايتىن ءۇش-ءتورت بالا تەلەفون سۇراعان. بۇل تەلەفونىن بەرمەگەن. پىشاقتاعان, سوسىن قاشىپ كەتكەن», — دەدى اقتوبە وبلىسى بالالار اۋرۋحاناسىنىڭ ءبولىم مەڭگەرۋشىسى راقىمجان اۋباكىروۆ.

وقيعا اقتوبە شەتىندەگى وڭتۇستىك-باتىس ىقشاماۋدانىندا بولعان. وقۋشىعا پىشاقتى ءوز ءۇيىنىڭ قاسىندا سالىپتى. كۇدىكتىنى ءتارتىپ ساقشىلارى تەرگەپ جاتىر. ول قالاداعى كوللەدجدەردىڭ ءبىرىنىڭ ستۋدەنتى ەكەن. بۇرىن ءبىر مەكتەپتە وقىعان. جاراقات العان ءجاسوسپىرىم وقيتىن مەكتەپ باسشىلارى ەكەۋىنىڭ دوس ەكەنىن ايتادى. سانىنا پىشاقتى «ابايسىزدا سالىپ الدى» دەيدى.  پوليتسەيلەر قىلمىستىق ءىس قوزعاپتى. بىراق ءتارتىپ ساقشىلارى وقيعانىڭ ءمان-جايىن اشىپ ايتپاي وتىر.

 «ءوزىنىڭ دوسى, ويناپ, كورىپ العان دا, سول جەردە جەرگە قاداپ وتىرعاندا تىزەسىنىڭ ۇستىنە قادالعان. سول عانا. بالا جاقسى. اتا-اناسى, بارلىعى حاباردار. بۇل جاعداي ابايسىزدا بولعان», — دەدى اقتوبەدەگى №10 مەكتەپ ديرەكتورى ينديرا بەكسۇلتانوۆا.