Aqtóbede tenderdiń bir bóligin alǵan ákimdik qyzmetkerleri 6 jylǵa sottaldy

Foto: Stan.kz

Shalqar aýdany ákiminiń orynbasary Bekturǵan Zaırymbet pen aýdandyq turǵyn úı-kommýnaldyq sharýashylyq bóliminiń basshysy Altynbaı Berkimbaev sot zalynan qamaýǵa alyndy, dep jazdy

Olar endi memlekettik qyzmetke kele almaıdy. Sottalýshylar qarjyny kedergisiz aýdarý, qamqorlyq jasaý úshin kelisimshart somasynyń 1%-yn aldy. Bul týraly Stan.kz aqparat agenttigi habarlaıdy.

Shalqar aýdandyq soty “Para alý” babymen aıyptalǵan qos sheneýnikti abaqtyǵa qamaý týraly úkim shyǵardy. Shalqar aýdany ákiminiń orynbasary Bekturǵan Zaırymbet Qylmystyq kodekstiń 366-baby 3-bóliginiń 1,2 tarmaǵymen (Para alý) aıyptalsa, aýdandyq turǵyn úı-kommýnaldyq sharýashylyq bóliminiń basshysy Altynbaı Berkimbaev Qylmystyq kodekstiń 366-baby 3-bóligi 1,2,4 tarmaǵy (Para alý) boıynsha kináli.

Qos sheneýnik adamdar tobynyń sóz baılasýymen merdigerdi qorqytyp, para alǵany dáleldendi. Sot Altynbaı Berkimbaevtan 1,5 mıllıon teńge memleket paıdasyna tárkileýdi mindettedi. Al Bekturǵan Zaırymbetten 1 mıllıon teńge memleket paıdasyna tárkilenýge tıis.

Sonymen qatar qos sheneýnik endi memlekettik qyzmette, sýdıa qyzmette, jergilikti ózin-ózi basqarý organdarynda, Ulttyq bankinde, onyń vedomstvolarynda, qarjy uıymdarynda ýákiletti organdarda, kvazımemlekettik sektor sýbekterinde laýazymdy atqarý quqyǵynan ómir boıyna aıyryldy. Sot árqaısysyna 6 jyl merzimge bas bostandyǵanan aıyrý jazasyn taǵaıyndady. Jazany qylmystyq atqarý júıesiniń ortasha qaýipsiz mekemesinde óteý belgilendi.

Is materıaldaryna sensek, aýdandyq TÚKSh bóliminiń basshysy Altynbaı Berkimbaevpen 2024 jyly  «Lıder-NS Stroı» JShS-men memlekettik satyp alý týraly kelisimsharty jasalǵan. Qosalqy merdiger – «Eýropa NS» JShS.  Kelisimshart quny – 223 796 648 teńge. Berkimbaev paıdakúnemdik pıǵylmen quzyretti jeke maqsatqa paıdalanyp, oryndalǵan jumystyń sapasyn teksermeı qabyldaý úshin kezinde kedergisiz ótkizý úshin 200 myń teńge aqsha alǵan.

Kelesi merdigerdi aýdan ákiminiń orynbasary men bólim basshysy birigip qorqytyp, 2,3 mıllıon teńge alǵan.

Onda «El damý yrys» JShS-i arasynda káriz qubyryn tartý úshin kelisimshart jasalady. Quny – 228 224 506 teńge.
Sottalýshylar qarjyny kedergisiz aýdarý, qamqorlyq jasaý úshin kelisimshart somasynyń 1 paıyzyn aldy. Iaǵnı, 2 mıllıon 300 myń teńge aqshasyn para retinde berýdi talap etken. “Para alý” babymen aıyptalǵan memlekettik qyzmetkerler jazasyn temir torda óteıdi.

Eske salaıyq, buǵan deıin Almaty turǵyndary kommýnaldyq qyzmette jumys istegen býhgalterdi iri kólemde alaıaqtyq jasady dep aıyptap otyr. Olardyń aıtýynsha, áıel qommýnaldyq qyzmet qarajatynan 58 mıllıon teńgeni jymqyryp, jeke qajetine jumsaǵan. Sonyń saldarynan bir turǵyn úı kesheniniń turǵyndary jóndeý jumystarynan qaǵylyp, turmystyq qıyndyqtarǵa tap boldy: tórt qabatty úılerde jıi jaryq óship, jertóleni sý basyp, shatyrdan sý aqqan. Atalǵan máselelerdi sheshýge arnalǵan qarjy bóten bireýdiń shotynda jatyr.