اقتوبەدە ءتۇرىن جاسىرعان ەر ادام كولىك جۇرگىزۋشىسىنە شابۋىل جاساعان

اقتوبەدە كوپقاباتتى ءۇيدىڭ اۋلاسىندا بەتپەردە تاققان بەلگىسىز ادام كولىكتىڭ اينەگىن سىندىرىپ, جۇرگىزۋشىنى ۇرىپ-سوققان, دەپ حابارلايدى Qandastar.kz

Stan.kz سايتىنىڭ جازۋىنشا, وقيعا تۇرعىن ءۇيدىڭ كىرەبەرىسىندەگى بەينەباقىلاۋ كامەراسىنا ءتۇسىپ قالعان. جازبادا كۇدىكتىنىڭ كولىككە جاقىنداپ, جۇرگىزۋشى جاعىنداعى اينەكتى سىندىرعانى, سودان كەيىن جۇرگىزۋشىنى كولىكتەن كۇشتەپ شىعارىپ, سوققىعا جىققانى كورىنەدى.

كورگەندەر بىردەن جەدەل جاردەم شاقىرىپ, جاراقات العان ازامات اۋرۋحاناعا جەتكىزىلگەن. ونىڭ جاعدايى تۋرالى دارىگەرلەر باقىلاۋ جۇرگىزىپ, قاجەتتى ەم قابىلداتىپ جاتقاندارىن مالىمدەدى.

پوليتسيا دەپارتامەنتى وقيعا بويىنشا قىلمىستىق ءىس قوزعالعانىن حابارلادى.

«كۇدىكتى قولعا ءتۇستى, تەرگەۋ بارىسىندا وقيعانىڭ ءمان-جايى انىقتالادى. زارداپ شەككەن ازامات قازىرگى تاڭدا مەديتسينالىق مەكەمەدە جاتىر», – دەدى وبلىستىق پوليتسيا دەپارتامەنتىنىڭ ءباسپاسوز قىزمەتىنىڭ جەتەكشىسى ەربولات سارقۇلوۆ.