اقتوبەدە ۋنيۆەرسيتەت باسشىسىنىڭ ايەلى تالاپكەرلەردەن اقشا العان

فوتو: ©El.kz/ارمان مۋحاتوۆ

اقتوبەدە ۋنيۆەرسيت باسشىسىنىڭ ايەلى تالاپكەرلەردەن وقۋعا ءتۇسۋ ءۇشىن اقشا العان. وقۋعا تۇسپەك بولعانداردىڭ وعان 100 مىڭنان 1,5 ملن تەڭگەگە دەيىن بەرگەنى بەلگىلى بولدى, دەپ حابارلايدى دياپازونعا سىلتەمە جاساپ El.kz اقپارات اگەنتتىگى. 

اقتوبە قالاسىندا حالىقارالىق كولىك-گۋمانيتارلىق ۋنيۆەرسيتەتىنىڭ وكىلدىگى بار. بۇل وقۋ ورنىنىڭ جەتەكشى مامانى الاياقتىقپەن ۇستالدى. انىقتالعانداي, گۇلميرا ت. ستۋدەنت بولامىن دەۋشىلەردەن وقۋ اقىسىن الىپ, ال اقشانى ءوز قالاۋىنشا جۇمساعان. 47 جاستاعى ايىپتالۋشىنىڭ قىلمىستىق ىسىندە 25 ەپيزود بار.

باسىلىمنىڭ جازۋىنشا, سوتتالۋشى تالاپكەرلەرگە ءوزىن وقۋ ورنىنىڭ ادىسكەرى رەتىندە تانىستىرىپ, وقۋ اقىسىن ءوزىنىڭ جەكە بانك شوتىنا اۋدارۋعا نەمەسە قولما-قول بەرۋگە بولاتىنىن ايتقان. جابىرلەنۋشىلەردىڭ ءبىرى وعان 1,5 ميلليون تەڭگەگە جۋىق اقشا تولەگەن. بىراق كەيىن ول ءوزىن ۋنيۆەرسيتەت ستۋدەنتتەرىنىڭ تىزىمدە جوق ەكەنىن بىلگەن. وزگە دە الدانىپ قالعاندار ءدال وسىنداي سحەمامەن وعان 100 مىڭنان 1,5 ميلليون تەڭگەگە دەيىن اقشا اۋدارعان. تالاپكەرلەردىڭ كەيبىرى بىرنەشە جىلدىق وقۋ اقىسىن تولەپ جاتىرمىز دەپ ويلاعان, الايدا سوڭىندا ول اقشانىڭ ۋنيۆەرسيتەت شوتىنا جەتپەگەنىن ءبىر-اق بىلگەن.

سوت وتىرىسىندا الاياقتىق جاسادى دەپ ايىپ تاعىلعان ايەل ءوز كىناسىن مويىندامادى. ول ءوز سوزىندە ۋنيۆەرسيتەتتىڭ اقتوبەدەگى فيليالىن كۇيەۋى باسقاراتىنىن, ونىڭ بارلىق اۋدارىمداردان حاباردار بولعانىن, ال زارداپ شەككەندەردەن تۇسكەن اقشا وتباسىنىڭ قاجەتتىلىگىنە جۇمسالعانىن ايتقان. بۇل قارجىنى كۇيەۋى مەن ونىڭ اتا-اناسى وزدىگىنشە جاراتقانىن العا تارتقان.

ايىپتالۋشى سوتتان كىشكەنتاي بالالارى بار ەكەنىن ەسكەرىپ, باس بوستاندىعىنان ايىرمايتىن جازا تاعايىنداۋدى سۇرادى.

سوتتا ايىپتالۋشىنىڭ كۇيەۋىنەن دە جاۋاپ الىندى. الايدا ول ايەلىنىڭ ستۋدەنتتەردەن اقشا العانىنان بەيحابار ەكەنىن جانە ونىڭ قارىزى تۋرالى ۋنيۆەرسيتەتتىڭ باس كەڭسەسىنەن قوڭىراۋ شالعاننان كەيىن بىلگەنىن اتاپ وتكەن.

سوت سوتتالۋشىنى الاياقتىق جاساعانى ءۇشىن كىنالى دەپ تانىپ, وعان اقشانى جابىرلەنۋشىلەرگە قايتارۋدى مىندەتتەدى جانە 3 جىلعا باس بوستاندىعىنان ايىردى.

ءىس وبلىستىق سوتتىڭ قىلمىستىق ىستەر جونىندەگى سوت القاسىندا قارالىپ, سوتتالۋشىنىڭ باس بوستاندىعىنان ايىرۋ جازاسى پروباتسيالىق باقىلاۋمەن باس بوستاندىعىن شەكتەۋ جازاسىنا اۋىستىرىلدى. سوت ۇيعارىمىندا ءىس اپەللياتسيالىق تارتىپتە قارالعان كەزدە سوتتالۋشىنىڭ وكىنىپ, بارلىق جابىرلەنۋشىلەرگە كەلتىرىلگەن زالالدى وتەۋىنە بايلانىستى جازا جەڭىلدەتىلگەنى اتاپ وتىلگەن.

سوت قاۋلىسى زاڭدى كۇشىنە ەندى.