اقتوبەدەگى وقيعاعا قاتىستى سوڭعى دەرەكتەر شىقتى

فوتو: اشىق دەرەككوز

اقتوبەدە بەيتانىس ەركەك ءۇش ادامدى كەپىلگە العان. وقيعاعا قاتىستى سوڭعى دەرەكتەر بەلگىلى بولدى,  دەپ جازدى qandastar.kz

وبلىستىڭ پوليتسيا دەپارتامەنتىنىڭ ءباسپاسوز ءبولىمى قالادا بولعان سۇمدىققا قاتىستى تاعى مالىمدەمە جاسادى.

«​13 قاڭتار كۇنى ساعات 20:00 شاماسىندا جەدەل باسقارۋ ورتالىعىنا اقتوبە قالاسىنداعى جەكە تۇرعىن ۇيدەن كەپىلگە الۋ تۋرالى حابارلاما كەلىپ ءتۇستى.
جەدەل-تەرگەۋ توبى مەن ارنايى بولىمشەلەر وقيعا ورنىنا دەرەۋ جەتتى. جەدەل قىزمەتتەر كەلگەن بويدا, كۇدىكتىمەن بۇرىن تانىس بولعان, ءبىر ايەلدىڭ كەپىلگە الىنعانى بەلگىلى بولدى.
بۇل رەتتە كۇدىكتى قانداي دا ءبىر تالاپتار قويعان جوق. ءۇش ساعاتتىق كەلىسسوزدەردەن كەيىن جانە كۇدىكتى كەپىلگە الىنعان ادامدى بوساتۋ تۋرالى تالاپتاردى ورىنداۋدان باس تارتقاننان سوڭ, شابۋىل جاساۋ تۋرالى شەشىم قابىلداندى.
​ارنايى وپەراتسيا ناتيجەسىندە كۇدىكتى ۇستالىپ, كەپىلگە الىنعان ايەل بوساتىلدى.
وقيعا بولعان جەردى زەردەلەۋ بارىسىندا جەرتولەدە پىشاق جاراقاتتارىمەن ەگدە جاستاعى اتا-اناسى تابىلدى.
​وكىنىشكە وراي, زارداپ شەككەندەردىڭ ءبىرى تاسىمالداۋ كەزىندە, ال ەكىنشىسى اۋرۋحانادا كوز جۇمدى. ءۇشىنشى جابىرلەنۋشىگە دارىگەرلەر بارلىق قاجەتتى مەديتسينالىق كومەك كورسەتۋدە.
​بۇل فاكتى بويىنشا قىلمىستىق ءىس قوزعالدى. كۇدىكتى ۋاقىتشا ۇستاۋ يزولياتورىنا قامالدى.
​پوليتسيا دەپارتامەنتى قازا تاپقانداردىڭ تۋىستارى مەن جاقىندارىنا كوڭىل ايتادى. كىنالى ادام زاڭنىڭ بارلىق قاتاڭدىعىمەن جازالاناتىن بولادى», — دەپ مالىمدەدى ارتىنشا وبلىستىق پد.

بۇدان بولەك, جەلىدە بەيتانىس ادامنىڭ ءزابىر كورگەن ايەلدىڭ بۇرىنعى جىگىتى ەكەنى تۋرالى اقپار تارادى. سونداي-اق قايتىس بولعان 75 جاستاعى ەر ادام كەپىلگە الىنعان ايەلدىڭ وگەي اكەسى دەگەن دە دەرەك بار.