اقتوبەلىك ەمشى كەلۋشىلەرىن 100 ملن نەسيەگە كىرگىزگەن

اقتوبەدە ءداستۇرلى ەمەس ەممەن اينالىساتىن ايەل 30 شاقتى كەلۋشىگە ءتۇرلى سىلتاۋمەن نەسيە العىزعان, دەپ حابارلايدى Skifnews.kz اقپارات پورتالى.

اقتوبە وبلىسىنىڭ پوليتسيا دەپارتامەنتى ەمشىنىڭ ۇستىنەن “اسا ءىرى كولەمدە الاياقتىق جاساۋ” دەرەگى بويىنشا قىلمىستىق ءىستى تەرگەپ-تەكسەرىپ جاتىر.

ءىس بويىنشا 30-عا جۋىق جابىرلەنۋشى بار. كۇدىكتى ولارعا سىرقات بالاسىن ەمدەتۋگە, مەشىت قۇرىلىسىنا, جاڭا ماسساج كابينەتىن اشۋعا قاجەت دەگەن ءتۇرلى سىلتاۋلار ايتىپ, ءتۇرلى بانكتەردەن 1 ميلليوننان 18 ميلليونعا تەڭگەگە دەيىن نەسيەلەر راسىمدەتكەن. ايەلدىڭ ۇيىنە ەمدەلۋگە كەلۋشىلەر ونىڭ ايتقانىنا سەنىپ, ءوز اتتارىنا ونلاين نەسيەلەر راسىمدەگەن. اقشانى ولار ەمشىنىڭ ەسەپشوتىنا اۋدارعان. كۇدىكتى نەسيەلەردى ءوزى تولەۋگە مىندەتتەنگەنىمەن, كەيىن ۋادەسىندە تۇرماعان.

“قازىرگى ۋاقىتتا زالال كولەمى 100 ميلليون تەڭگەگە جۋىقتادى. كۇدىكتى ۋاقىتشا ۇستاۋ يزولياتورىنا قامالدى. سوتقا دەيىنگى تەرگەپ-تەكسەرۋ جالعاسىپ جاتىر. قازىرگى ۋاقىتتا ءىس بويىنشا باسقا دا جابىرلەنۋشىلەردىڭ بولۋى جانە كۇدىكتىنىڭ اقشانى قانداي ماقساتتارعا جۇمساعانى دا انىقتالىپ جاتىر”, – دەپ مالىمدەدى پوليتسيا دەپارتامەنتى.