Aqtóbelik kranshy zeınetker týǵan qalasyn tótenshe jaǵdaıdan shyǵarýǵa kómektesti

Shyńǵystaý Ábdıev — 36 jyl boıy Aqtóbe sý qoımasynda tehnık-mehanık mamandyǵy boıynsha kran tasymaldaýshy bolyp jumys istegen. О́tken jyldyń jeltoqsan aıynda zeınetkerlikke shyqqan. Aımaqta sý tasqyny bastalǵan kezde onyń kásibıligi men tájirıbesi tótenshe jaǵdaıdy sheshýge jáne qalany sý tasqynynan qutqarýǵa kómektesti.

Buǵan deıin sý tasqyny kezinde «Qazsýshardyń» mamandary bógette bir ǵana shlıýz ashyp kelgen. Bógette árqaısysy sekýndyna 600 tekshe metr sý ótkize alatyn bes shlıýz bar. Al 28 naýryzda sekýndyna 1000 tekshe metrge deıin sý jiberý týraly sheshim qabyldanyp, ekinshi shlıýzdi ashý kerek boldy. Ol úshin portaldy krandy jyljytý qajettigi týyndady. Salmaǵy 126 tonna krannyń tartatyn kran relstermen qozǵalady.

«Buryn-sońdy bul krandy qoldanbaǵandyqtan, mamandar ony júrgize bastaǵanda tejegishi durys istemeı, relsterge keptetilip qaldy. Biz úshin ár mınýt qymbat boldy, sebebi sý mólsheri saǵat saıyn artyp bara jatty, al biz krandy iske qosa almaı jatyrmyz. Osy kezde buryn krandy uzaq júrgizgen, bizge kómektese alatyn maman izdedik. Osylaısha Shyńǵystaý Qıbashulyna ótinishpen shyqtyq. Birden kelisken Shyńǵystaý Qıbashuly kelip, jarty saǵattyń ishinde máseleni sheship berdi. Kranǵa ózi otyryp, ekinshi shlıýzdi ashty. Sonyń arqasynda ýaqytynda sýdyń qajetti mólsherin jiberip, Aqtóbe sý qoımasynyń tasyp ketýiniń aldyn aldyq», — dedi Aqtóbe oblysy boıynsha «Qazsýshar» basshysy Rınat Shaýenov.

«Osynda birneshe jyl jumys istegeli sýdyń osyndaı qatty qarqynmen kelgenin birinshi ret kórip turmyn. Sý qoımasy 12 saǵattyń ishinde tolyp boldy. Áli esimde, 1993 jyly sý sekýndyna 1250 tekshe metr sý kelse, bul joly sekýndyna 1700 tekshe metr sý kelip jatty. Bar bolǵany 2-3 saǵattyń ishinde sýdy jyldam aǵyzyp jiberýge týra keldi. Olaı bolmaǵanda Aqtóbeni sý alatyn edi, abyroı bolǵanda barlyǵyn der kezinde rettedik», — dep atap ótti Shyńǵystaý Qıbashuly.

Aqtóbe oblysy boıynsha «Qazsýshar» basshylyǵy Shyńǵystaý Qıbashulyn qaıtadan jumysqa qosylýyn usyndy. Osylaısha ol 29 naýryzdan bastap qaıtadan kran mashınısi qyzmetine kiristi. Tájirıbeli maman jastarǵa jaýapty jumystyń qyr-syryn úıretip, tájirıbesimen bólispek. Búginde Shyńǵystaý Qıbashulynyń úsh ulynyń biri sý sharýashylyǵy salasynda jumys isteıdi.