جاڭالىقتار
اقتوبەلىكتەر جولداعى ولقىلىققا اكىمدى كىنالاۋدا
فوتو: اشىق دەرەككوز
اقتوبە قالاسىنىڭ قاق ورتاسىندا كولىك كەپتەلەسىنە سەبەپ بولعان جول اپاتى تىركەلدى. قالا تۇرعىندارى جول اپاتى جيىلەگەنىن العا تارتىپ, وبلىس اكىمىنىڭ جۇمىس ىستەمەيتىندىگىن جارىسا جازۋدا, دەپ حابارلايدى qandastar.kz
اپات 5 ناۋرىز كۇنى ورتالىق كوشەلەردىڭ ءبىرى بولىپ سانالاتىن ابىلقايىر حان داڭعىلىندا بولعان. BMW X5 كولىگى مەن Porshe كولىگى سوقتىعىسىپ قالعان. ناتيجەسىندە №46-اۆتوبۋس قيىلىستا قىستىرىلىپ قالىپ, كوشەدەگى كولىك كەپتەلىسىنە الىپ كەلگەن. ەكى باعىتقا دا قوزعالىس جوق.
ۆيدەو كادرلارىنان كوشەدەگى قاردىڭ ۋاقىتىلى تازارتىلماعانىن كورۋگە بولادى. اقتوبەلىكتەر بولسا, اكىمدىكتىڭ جۇمىسقا سالعىرت قارايتىنىن جازىپ, كوشەدەگى جولداردىڭ كولىكتىڭ ەركىن قوزعالۋىنا مۇمكىندىك بەرمەيتىنىن ناتيجەسىندە وسىنداي اپاتتار ءجيى بولاتىنىن جارىسا جازعان.
«وقيعا ورنىندا بىردە دە ءبىر پوليتسيا قىزمەتكەرى بولعان جوق. قالا بويىنشا سۇمدىق كەپتەلىس بولدى», «نەگە قاردى ۋاقىتىلى تازارتىپ, شىعارىپ تاستامايدى? بارلىعىمىز ارىزدانۋىمىز كەرەك!», «شاحاروۆ اكىم بولعالى قالانىڭ جاعدايى قيىنداپ بارا جاتىر», «وسىنىڭ بارلىعىنا اكىمدىك كىنالى. تەندەر ۇستاعاننىڭ قولىندا كەتىپ جاتىر. جول تازالانبايدى. ءتورت جولاقتى جول دەيدى, بىراق ول ەكى جولاقتى بولادى. ول جولمەن يت تە, ادام دا, كولىك تە قىسىلىپ جۇرەدى. ناتيجەسى وسىنداي اپاتتار», «ادەتتەگىدەي قاردى تازالاۋعا تەحنيكا جەتىسپەي مە?», «اكىمشىلىكتىڭ الدىن جالاپ تازالاپ بولماي, كوشەلەرگە قارامايدى», — دەيدى ولار.
بۇدان بولەك, كادرداعىداي ۇلكەن اۆتوبۋستار اقتوبەنىڭ تار كوشەلەرىنە ارنالماعان دەپ قارسىلىق تانىتىپ جاتقانداردىڭ قاراسى كوپ. جول اپاتى كەشە بولسا دا, كەپتەلىس بۇگىن تاڭعا دەيىن جالعاسقان. ال وبلىستىق پوليتسيا دەپارتامەنتى بولسا, زارداپ شەككەندەر جوق ەكەنىن العا تارتىپ, ادەتتەگىدەي جۇرگىزۋشىلەردەن جول ەرەجەسىن ساقتاۋدى تالاپ ەتىپ وتىر.
