«اقىمدى تولەدىم»: سەنىمنەن شىقتى دەگەن جانار وتەشوۆا ەلدى ويلاندىرىپ قويدى

فوتو: ۇوك

جانار وتەشوۆا ۇلتتىق وليمپيادا كوميتەتىندەگى قىزمەتىنەن رەسمي تۇردە كەتتى, دەپ حابارلايدى qandastar.kz Ozgeris.info سىلتەمە جاساپ. 

«بۇگىن مەن ءۇشىن ۇوك تاراۋى جابىلدى. 13 قىركۇيەكتە مەن رەسمي تۇردە باس حاتشى لاۋازىمىنان ءوز ەركىممەن كەتتىم. بىردەن ايتا كەتەيىن, باق بەتتەرىندە وسىعان دەيىن ءوزىم قۇرعان دەرەككوزگە سۇيەنە وتىرا سەنساتسيا رەتىندە تاراتقان «قىزمەتىنەن بوساتىلدى» دەگەن جاڭالىقتارى شىندىققا جاناسپايتىن ەدى. زاڭگەرلەر ماعان ءوز اتىمدى قورعاۋىم ءۇشىن سوتقا جۇگىنۋگە كەڭەس بەرگەن بولاتىن. الايدا مەنىڭ اتىم, نيەتىم مەن ار-نامىسىم تازا جانە قورعاۋدى تالاپ ەتپەيتىنىنە سەنىمدى بولعاندىقتان مۇنداي ۇسىنىستان باس تارتتىم. مەن ءوز قالاۋىممەن كەتتىم. ءوز شارتتارىم بويىنشا, وتەماقىسىز, ءۇنسىز قالۋ مىندەتتەمەسىنسىز جانە ەرتەڭ جالعان جىميۋدى تالاپ ەتپەيتىن جاعدايدا ءبىر ءبولىمنىڭ ەسىگىن جاپتىم. جەر دومالاق. الدىمىزدا ءبىزدى قانشاما دۇنيە كۇتىپ تۇر», — دەپ جازدى ول.

ونىڭ ايتۋىنشا تامىزدان بەرى وعان بىرنەشە ۇسىنىس تۇسكەن. سونىڭ ىشىندە باسقا ەلدەردەن دە كەلگەن ۇسىنىستار بار. بىراق ول قازاقستاننان ارتىق ەشبىرى جاقىن بولا المايتىنىن ايتقان. الايدا, ءالى ناقتى ۇيعارىم جاساماعان.

«بولىپ جاتقان دۇنيەنىڭ بارلىعى جاقسىلىققا جەتەلەيتىنىنە سەنەمىن. مۇنى ماعان تۋعان-تۋىستارىم مەن دوستارىم دا ايتىپ ءجۇر. دوستار قاتارىنا سوڭعى جىلدارى سپورتتان كوپتەپ قوسىلعاندارى تاعى بار. وسى جازبامدى سۇيىكتى سپورتشىلارىما ارناعان تىلەگىممەن اياقتاعىم كەلەدى: سىزدەر مەدالدار ءۇشىن تالاي رەت كۇرەستىڭىزدەر, وعان دەيىن باسقا «شايقاستاردا دا» جەڭىپ شىقتىڭىزدار. سىزدەردىڭ بۇدان ءارى دە جەتىستىكتەرگە جەتە بەرەتىنىڭىزگە, جەڭىستى جولدارىڭىزدىڭ جالعاسىن تاباتىنىنا سەنىمدىمىن. مەن ءاردايىم سىزدەردىڭ جانكۇيەرلەرىڭىز بولىپ قالا بەرەمىن, سىزدەرمەن ماقتانا بەرەمىن. ويتكەنى جەڭىستىڭ قۇنى قانداي ەكەنىن بىلەمىن. وتكەن وقيعا مەنىڭ جەڭىسىم دەپ سانايمىن. ول ءۇشىن اقىمدى تولەدىم», — دەپ جازدى ج. وتەشوۆا.

ەسكە سالساق,  بيىلعى تامىز ايىندا جانار وتەشوۆانىڭ گەننادي گولوۆكيننىڭ شەشىمىنە قاتىستى مالىمدەمە جاساعانى تۋرالى جازعان ەدىك.