اقىن داۋعا قالدى: اقبەرەن ەلگەزەك زاڭسىز پايدا تاپتى ما?

فوتو: جەكە قورىنان

جەلىدە اقىن اقبەرەك ەلگەزەك پەن ونىڭ جۇبايى, جۋرناليست دينا ەلگەزەكتىڭ تابىسى قىزۋ تالقىعا ءتۇسىپ جاتىر. جاسىرىن telegram ارنالار ولارعا زاڭسىز تابىس تاپتى دەگەن ايىپ تاقتى, دەپ جازدى qandastar.kz

Orda.kz  اقبەرەن ەلگەزەكتىڭ وزىنە حابارلاسىپ ءمان-جايدى سۇراستىردى.

بۇل اڭگىمە نەدەن شىقتى?

اۆتورى بەلگىسىز telegram-ارنالار ەلگەزەكتەردىڭ زاڭسىز تابىس تاپقانىن ايتىپ جازبا جاريالادى. جازبادا ەلگەزەكتەردىڭ وتباسىنا «Abai baspasy» جشس, «Alim Best» جشس, «Tengri Gold» جشس جانە «ULT MEDIA» قق اتتى 4 كومپانيا تيەسىلى ەكەنى جازىلدى. جاسىرىن ارنانىڭ اۆتورى كومپانيالاردىڭ تابىسى 1 ملرد تەڭگەدەن اسقانىن ايتتى. اقبەرەن ەلگەزەك تۇراتىن ءۇيدى دە سوزىنە قوستى.

وسىدان 2 جىل بۇرىن Abai TV تەلەارناسىنا بەرگەن سۇحباتىندا اقبەرەن ەلگەزەك ءۇيىن كورسەتكەن بولاتىن. اڭگىمە وسى ءۇي تۋرالى بولىپ وتىر.

ارنا اۆتورى 1 ملرد تەڭگەنىڭ 610 ملن تەڭگەسى مەملەكەتتىك بيۋدجەتتىڭ اقشاسى ەكەنىن ايتتى. Telegram-ارناسىنىڭ اۆتورى 413 ملن-ى «اباي باسپاسى», 186 ملن – «ULT MEDIA» قوعامدىق قورى, 11,2 ملن – «Tengri Gold» جشس ارقىلى اقىننىڭ قالتاسىنا تۇسكەن دەپ جازادى. جازبا اۆتورى «اباي باسپاسىن» قاعاز جۇزىندە باسپاحاناسى بار بولعانىمەن, قۇرالدارى جوق جانە باسقا جاقتان شىققان كىتاپتاردى ءوز اتىنان شىعارىپ, مەملەكەتكە قىمباتقا ساتادى دەپ جازدى. سونداي-اق جازبادا اقبەرەن ەلگەزەككە مەملەكەتتىك قىزمەتتە بولعان كەزدە تانىسقان ادامدارىن پايدالانىپ, اكىمدىكتەرمەن كەلىسىپ, مەملەكەتتەن تاپسىرىس الادى دەگەن ايىپ تاعىلدى. الماتى وبلىسى اكىمدىگىنەن 112 ملن تەڭگە, ماڭعىستاۋ وبلىسى اكىمدىگىنەن 92 ملن تەڭگە, قىزىلوردا وبلىسى اكىمدىگىنەن 81 ملن تەڭگە, جامبىل وبلىسى اكىمدىگىنەن 67 ملن تەڭگە العان دەپ ايىپ تاقتى جاسىرىن ارنانىڭ اۆتورى.

اقبەرەن ەلگەزەك نە دەيدى?

Facebook جەلىسىندە وسى ماسەلە قىزۋ تالقىعا تۇسكەن سوڭ, اقىن اقبەرەن ەلگەزەك جازبا جاريالاپ, بۇل جاعدايدىڭ اقپاراتتىق شابۋىل ەكەنىن, ءوزىنىڭ ماڭداي تەرىمەن تابىس تاپقانىن, زاڭدى بۇزباعانىن جانە كەلىپ تەكسەرەم دەۋشىلەرگە اشىق ەكەنىن مالىمدەدى. ەلگەزەك جەكە بيزنەسىنىڭ اشىقتىعىن كورسەتىپ, بارلىق ەسەپشوتتارى مەن قارجى مالىمەتتەرىن جاريالادى. اقىن كىتاپتارعا قاتىستى ايتىلعان سىندارعا دا جاۋاپ بەرىپ, «مەن ساتىپ جۇرگەن كىتاپتىڭ بارلىعى دا «اباي» باسپاسىنىڭ ءوزىنىڭ ءتول ءونىمى» دەپ مالىمدەدى. ول تەك زاڭدى تۇردە جۇمىس ىستەيتىنىن ايتىپ, «ساتسام, ماڭداي تەر, ادال ەڭبەگىمدى ساتتىم» دەپ ءوز ەڭبەگىنىڭ ناتيجەسىن ساتاتىنىن جەتكىزدى.

Orda.kz ءتىلشىسى اقبەرەن ەلگەزەككە حابارلاسىپ, جاسىرىن ارنالارعا قاتىستى سۇراستىردى. اقبەرەن ەلگەزەك ەگەر ايىبى بولسا اشىق زاڭ جۇزىندە ۇستاپ, ايىپ تاعاتىنىن, ال بۇلاي جاسىرىن ارنا ارقىلى اقپارات تاراتقانداردىڭ ناقاق جالا جاۋىپ وتىرعانىن ايتتى. قازىر جاسىرىن ارنالار تۋرالى زاڭگەرلەرمەن كەڭەسىپ جاتقاندارىن ايتتى.

«بىرىنشىدەن, ءبىز ول ءانونيمدى ارنالاردىڭ كىمدىكى ەكەنىن بىلمەيمىز. بىراق قازىر زاڭگەرلەرمەن كەڭەسىپ جاتىرمىز. بۇلاردىڭ ارتىندا كىم تۇرعانىن قۇداي ءبىلسىن. ادامنىڭ كىناسى بولسا, قىلمىسى بولسا, ول اشىق جازىلادى. بۇقارالىق اقپارات قۇرالدارى بار, زاڭدى تۇردە, اشىق شاعىمىن ايتار ەدى. ادال ەڭبەك ىستەپ, ادال نانىن تاۋىپ جۇرگەن ادامدارعا وسىنداي دۇنيە ۇيىمداستىراتىندار بار. مەن كىم ۇيىمداستىراتىنىن شىنىمدى ايتايىن, بىلمەيمىن. بوستان بوس ادامعا تيىسپەيدى عوي. ءبىز سياقتى جۇمىس ىستەپ جۇرگەن 4000-عا جۋىق باسپا بار. قانشاما وليگارحتار بار… مەملەكەتتەن ميللياردتاپ, دوللارلاپ قارجى الىپ جاتقان. ولار تۋرالى ەشتەڭە ايتپايدى. مەن شوتىمنىڭ ءبارىن اشىق كورسەتىپ قويدىم. ءبىر كومپانيامدا 4 ميلليون تەڭگە تۇر. ونىڭ ءوزى جاۋىپ تاستاماسىن دەپ ساقتاپ وتىرعان اقشام. ونى ءسوز قىلىپ ايتۋدىڭ قانشالىقتى قاجەتى بار? مۇنىڭ ارتىندا باسقا ءبىر نارسە تۇر», — دەدى اقبەرەن ەلگەزەك.

سونىمەن قاتار ول الدەكىمدەردىڭ ىشتارلىقپەن اياقتاپ شالىپ وتىرۋى مۇمكىن ەكەنىن ايتتى. اقىننىڭ سوزىنشە ونىڭ جاڭادان ءتۇسىرىپ جاتقان فيلمىنە جۇرت بارماۋى ءۇشىن جەك كورىنىشتى قىلىپ كورسەتۋگە تىرىسىپ جاتىر.

«بىرەۋلەر قىزعانۋى مۇمكىن. كينوسى شىعايىن دەپ جاتىر, ەلدىڭ الدىندا جەك كورىنىشتى قىلايىق, كينوسىنا بارماسىن دەپ. جاۋ الىستان كەلمەيدى. كينونىڭ ءبارى قارجىعا شىعىپ جاتقانىن, قانشاما كومپانياعا قارىزبىز, پروكاتتان كەيىن ەسەپتەسەمىز دەپ وتىرمىز. بۇل قۇدايدىڭ ماركەتينگى بولدى. ادال ادامعا قيانات جاسايمىن دەگەن كەزدە, قۇداي ونى قورعايدى. مەنەن قورىقپاسىن, ادامنان قورىقپاسىن, اللادان قورىقسىن. ول ادام وسى دۇنيەدە جاۋاپ بەرەدى. و دۇنيە بولەك اڭگىمە. بالا-شاعاسىن, ءوزىن ويلاۋى كەرەك قوي. مەن ەشتەڭە ىستەمەدىم, ەلدىڭ الدىندا اشىق ءجۇرمىن», – دەدى اقبەرەن ەلگەزەك.

اقبەرەن ەلگەزەك – 1980 جىلى الماتى قالاسىندا دۇنيەگە كەلگەن. قالامگەردىڭ «كولەڭكەلەر كۇبىرى», «عارشى», «شەكسىزدىك سىرتىنداعى شام», «Fantasmagoria» (تۇرىك تىلىندە) اتتى جىر جيناقتارى مەن «بولماعان بالالىق شاق» اتتى پوۆەسى جارىق كورگەن.

اقىن 2001 – 2003 جىلدارى الماتى قالالىق Iشكi ساياسات دەپارتامەنتiنiڭ باس مامانى بولدى. 2003 – 2004 جىلدارى – قر ۇلتتىق ينجەنەرلiك اكادەمياسى پرەزيدەنتiنiڭ كەڭەسشiسى بولدى. بىرقاتار قىزمەتتەردە بولعان اقىن 2012 جىلى قر ءبىلىم جانە عىلىم مينيسترلىگى «اقپاراتتىق-تالداۋ ورتالىعى» اق-نىڭ ۆيتسە-پرەزيدەنتى, 2012-2015 جىلدارى ۇلت پورتالى باسىلىمىنىڭ باس رەداكتورى قىزمەتىن اتقاردى. ال 2015-2016 جىلدارى وڭتۇستىك قازاقستان وبلىسى اكىمى اپپارات باسشىسىنىڭ ورىنباسارى, 2016-2017 جىلدارى قازاقستان رەسپۋبليكاسى قورعانىس جانە اەروعارىش ونەركاسىبى ءمينيسترىنىڭ كەڭەسشىسى-ءباسپاسوز xاتشىسى بولعان. ال 2018 جىلدان 2023 جىلعا دەيىن قازاقستان جازۋشىلار وداعى باسقارما توراعاسىنىڭ ءبىرىنشى ورىنباسارى بولدى. قازىر «اباي» باسپاسىنىڭ ديرەكتورى.

اقىن مەملەكەتتىك «دارىن» جاستار سىيلىعىنىڭ, قازاقستان جاستار وداعىنىڭ «سەرپەر» جانە «التىن قالام» ۇلتتىق سىيلىقتارىنىڭ لاۋرەاتى. «سەمسەر» ۇلتتىق ادەبي بايقاۋىنىڭ گران-پري يەگەرى. حالىقارالىق ماحمۇد قاشقاري سىيلىعىنىڭ لاۋرەاتى. كوپتەگەن رەسپۋبليكالىق ءمۇشايرالاردىڭ جۇلدەگەرى.

اقبەرەن ەلگەزەكتىڭ جۇبايى دينا ەلگەزەك – جۋرناليست, قوعام بەلسەندىسى, ءتىل ماسەلەسىن كوتەرىپ, ەل اراسىندا حالىقتىڭ ءسوزىن سويلەپ, بيلىكتى سىناپ جۇرگەن ادامداردىڭ ءبىرى.

1974 جىلى ارالدا دۇنيەگە كەلگەن. «حابار» تەلەارناسىندا جۇمىس ىستەگەن. 2012-2014 جىلدارى قازاقستان ۇلتتىق تەلەارناسىندا قىزمەت اتقارعان. قازىرگى كەزدە  Ult.kz ينتەرنەت باسىلىمىنا ماقالالار جاريالايدى. Ult.kz باسىلىمى اقبەرەن ەلگەزەكتىڭ «Tengri Gold» جشس-نە تيەسىلى. دينا ەلگەزەك كوپ سۇحباتتارىندا بيلىكتى سىنعا الىپ جۇرگەن جۋرناليست. مىسالى ARA MEDIA youtube ارناسىنا بەرگەن سۇحباتىندا دينا ەلگەزەك قاسىم جومارت توقاەۆتىڭ ەسكەرتۋسىز وق اتۋى جايلى بۇيرىعىن سىنعا الىپ, اشىق پىكىر ءبىلدىردى.