Ақын дауға қалды: Ақберен Елгезек заңсыз пайда тапты ма?

Фото: жеке қорынан

Желіде ақын Ақберек Елгезек пен оның жұбайы, журналист Дина Елгезектің табысы қызу талқыға түсіп жатыр. Жасырын telegram арналар оларға заңсыз табыс тапты деген айып тақты, деп жазды qandastar.kz

Orda.kz  Ақберен Елгезектің өзіне хабарласып мән-жайды сұрастырды.

Бұл әңгіме неден шықты?

Авторы белгісіз telegram-арналар Елгезектердің заңсыз табыс тапқанын айтып жазба жариялады. Жазбада Елгезектердің отбасына «Abai baspasy» ЖШС, «Alim Best» ЖШС, «Tengri Gold» ЖШС және «ULT MEDIA» ҚҚ атты 4 компания тиесілі екені жазылды. Жасырын арнаның авторы компаниялардың табысы 1 млрд теңгеден асқанын айтты. Ақберен Елгезек тұратын үйді де сөзіне қосты.

Осыдан 2 жыл бұрын Abai TV телеарнасына берген сұхбатында Ақберен Елгезек үйін көрсеткен болатын. Әңгіме осы үй туралы болып отыр.

Арна авторы 1 млрд теңгенің 610 млн теңгесі мемлекеттік бюджеттің ақшасы екенін айтты. Telegram-арнасының авторы 413 млн-ы «Абай баспасы», 186 млн – «ULT MEDIA» қоғамдық қоры, 11,2 млн – «Tengri Gold» ЖШС арқылы ақынның қалтасына түскен деп жазады. Жазба авторы «Абай баспасын» қағаз жүзінде баспаханасы бар болғанымен, құралдары жоқ және басқа жақтан шыққан кітаптарды өз атынан шығарып, мемлекетке қымбатқа сатады деп жазды. Сондай-ақ жазбада Ақберен Елгезекке мемлекеттік қызметте болған кезде танысқан адамдарын пайдаланып, әкімдіктермен келісіп, мемлекеттен тапсырыс алады деген айып тағылды. Алматы облысы әкімдігінен 112 млн теңге, Маңғыстау облысы әкімдігінен 92 млн теңге, Қызылорда облысы әкімдігінен 81 млн теңге, Жамбыл облысы әкімдігінен 67 млн теңге алған деп айып тақты жасырын арнаның авторы.

Ақберен Елгезек не дейді?

Facebook желісінде осы мәселе қызу талқыға түскен соң, ақын Ақберен Елгезек жазба жариялап, бұл жағдайдың ақпараттық шабуыл екенін, өзінің маңдай терімен табыс тапқанын, заңды бұзбағанын және келіп тексерем деушілерге ашық екенін мәлімдеді. Елгезек жеке бизнесінің ашықтығын көрсетіп, барлық есепшоттары мен қаржы мәліметтерін жариялады. Ақын кітаптарға қатысты айтылған сындарға да жауап беріп, «Мен сатып жүрген кітаптың барлығы да «Абай» баспасының өзінің төл өнімі» деп мәлімдеді. Ол тек заңды түрде жұмыс істейтінін айтып, «Сатсам, маңдай тер, адал еңбегімді саттым» деп өз еңбегінің нәтижесін сататынын жеткізді.

Orda.kz тілшісі Ақберен Елгезекке хабарласып, жасырын арналарға қатысты сұрастырды. Ақберен Елгезек егер айыбы болса ашық заң жүзінде ұстап, айып тағатынын, ал бұлай жасырын арна арқылы ақпарат таратқандардың нақақ жала жауып отырғанын айтты. Қазір жасырын арналар туралы заңгерлермен кеңесіп жатқандарын айтты.

«Біріншіден, біз ол анонимді арналардың кімдікі екенін білмейміз. Бірақ қазір заңгерлермен кеңесіп жатырмыз. Бұлардың артында кім тұрғанын құдай білсін. Адамның кінәсі болса, қылмысы болса, ол ашық жазылады. Бұқаралық ақпарат құралдары бар, заңды түрде, ашық шағымын айтар еді. Адал еңбек істеп, адал нанын тауып жүрген адамдарға осындай дүние ұйымдастыратындар бар. Мен кім ұйымдастыратынын шынымды айтайын, білмеймін. Бостан бос адамға тиіспейді ғой. Біз сияқты жұмыс істеп жүрген 4000-ға жуық баспа бар. Қаншама олигархтар бар… Мемлекеттен миллиардтап, долларлап қаржы алып жатқан. Олар туралы ештеңе айтпайды. Мен шотымның бәрін ашық көрсетіп қойдым. Бір компаниямда 4 миллион теңге тұр. Оның өзі жауып тастамасын деп сақтап отырған ақшам. Оны сөз қылып айтудың қаншалықты қажеті бар? Мұның артында басқа бір нәрсе тұр», — деді Ақберен Елгезек.

Сонымен қатар ол әлдекімдердің іштарлықпен аяқтап шалып отыруы мүмкін екенін айтты. Ақынның сөзінше оның жаңадан түсіріп жатқан фильміне жұрт бармауы үшін жек көрінішті қылып көрсетуге тырысып жатыр.

«Біреулер қызғануы мүмкін. Киносы шығайын деп жатыр, елдің алдында жек көрінішті қылайық, киносына бармасын деп. Жау алыстан келмейді. Киноның бәрі қаржыға шығып жатқанын, қаншама компанияға қарызбыз, прокаттан кейін есептесеміз деп отырмыз. Бұл құдайдың маркетингі болды. Адал адамға қиянат жасаймын деген кезде, құдай оны қорғайды. Менен қорықпасын, адамнан қорықпасын, Алладан қорықсын. Ол адам осы дүниеде жауап береді. О дүние бөлек әңгіме. Бала-шағасын, өзін ойлауы керек қой. Мен ештеңе істемедім, елдің алдында ашық жүрмін», – деді Ақберен Елгезек.

Ақберен Елгезек – 1980 жылы Алматы қаласында дүниеге келген. Қаламгердің «Көлеңкелер күбірі», «Ғаршы», «Шексіздік сыртындағы шам», «Fantasmagoria» (түрік тілінде) атты жыр жинақтары мен «Болмаған балалық шақ» атты повесі жарық көрген.

Ақын 2001 – 2003 жылдары Алматы қалалық Iшкi саясат департаментiнiң бас маманы болды. 2003 – 2004 жылдары – ҚР Ұлттық инженерлiк академиясы Президентiнiң кеңесшiсі болды. Бірқатар қызметтерде болған ақын 2012 жылы ҚР Білім және ғылым министрлігі «Ақпараттық-талдау орталығы» АҚ-ның вице-президенті, 2012-2015 жылдары Ұлт порталы басылымының бас редакторы қызметін атқарды. Ал 2015-2016 жылдары Оңтүстік Қазақстан облысы әкімі аппарат басшысының орынбасары, 2016-2017 жылдары Қазақстан Республикасы Қорғаныс және аэроғарыш өнеркәсібі министрінің кеңесшісі-баспасөз xатшысы болған. Ал 2018 жылдан 2023 жылға дейін Қазақстан Жазушылар одағы басқарма төрағасының бірінші орынбасары болды. Қазір «Абай» баспасының директоры.

Ақын мемлекеттік «Дарын» жастар сыйлығының, Қазақстан Жастар одағының «Серпер» және «Алтын қалам» ұлттық сыйлықтарының лауреаты. «Семсер» ұлттық әдеби байқауының Гран-При иегері. Халықаралық Махмұд Қашқари сыйлығының лауреаты. Көптеген республикалық мүшәйралардың жүлдегері.

Ақберен Елгезектің жұбайы Дина Елгезек – журналист, қоғам белсендісі, тіл мәселесін көтеріп, ел арасында халықтың сөзін сөйлеп, билікті сынап жүрген адамдардың бірі.

1974 жылы Аралда дүниеге келген. «Хабар» телеарнасында жұмыс істеген. 2012-2014 жылдары Қазақстан ұлттық телеарнасында қызмет атқарған. Қазіргі кезде  Ult.kz интернет басылымына мақалалар жариялайды. Ult.kz басылымы Ақберен Елгезектің «Tengri Gold» ЖШС-не тиесілі. Дина Елгезек көп сұхбаттарында билікті сынға алып жүрген журналист. Мысалы ARA MEDIA youtube арнасына берген сұхбатында Дина Елгезек Қасым Жомарт Тоқаевтың ескертусіз оқ атуы жайлы бұйрығын сынға алып, ашық пікір білдірді.