اقىن قازىرگى اۋەندەردى سىنادى

فوتو:jasqazaq.kz

اقىن اسقار دۇيسەنبى قازىرگى جاستاردىڭ سۇرانىسىنداعى اندەرگە بايلانىستى پىكىر ءبىلدىردى, دەپ حابارلايدى qandastar.kz اقپارات پورتالى.

«جاستاردىڭ كوبى اۋەنگە ەلىكتەيدى. ال ءسوزدىڭ ماتىنىنە ءمان بەرە بەرمەيتىن سەكىلدى. قازىر ەشقانداي باقىلاۋ جوق. ءان ءماتىنىن باقىلايتىن ارنايى ورگان بولۋى كەرەك. كىم نە ايتقىسى كەلەدى, سونى ايتىپ جاتىر. اندە دە سۇزگى بولۋى كەرەك. كىم نە ايتادى, سونى ايتا بەرەتىن بولسا, ول – ونەر بولمايدى! ونەر بولعان سوڭ بەلگىلى ءبىر تارازى مەن ولشەمى بولۋى كەرەك. سوندا سوزدە دە ءمان, اندە دە اۋەز بولادى», — دەيدى اقىن.

اسقار دۇيسەنبى جاستاردىڭ قازىرگى ءان تالعامى وزگەشە دەپ باعالايدى. ءتىپتى, جاڭا تەندەنتسياعا قالام تارتۋعا جۇرەكسىنەتىنىن دە جەتكىزدى.

“قازىر جەڭىل, كۇندەلىكتى تۇرمىستا قولداناتىن, كوشە سوزدەرى قولدانىلعان جەڭىل اندەر ترەندتە. وندا كوركەمدىك بولماۋى مۇمكىن. الايدا نەگىزگى باعىت اۋەنگە باسىمدىق بەرىلەدى. سول سەبەپتى جاستار تەك اۋەنگە ەلىكتەيدى. ونىڭ سوزىنە ءمان بەرمەيدى.

قازىرگى شىعىپ جاتقان جاس تولقىن انشىلەردى كوپ تىڭدايمىن, قاراپ وتىرامىن. كىم, قاي باعىتتا ءان ورىنداپ, ونەردى دامىتىپ جاتىر دەپ قارايمىن. مىسالى, «91» توبىنىڭ جانكۇيەرى ەمەسپىن. جاڭا شىعا باستاعان كەزدەن باستاپ-اق, قاراپ, تىڭداپ كوردىم. جاڭا زاماننىڭ باعىتى شىعار, ارينە! بىراق اندەرىنىڭ ماتىندەرىنە كوڭىلىم تولمايدى. سول سەكىلدى كاليفارنيا دەگەن دە بار”, – دەيدى اقىن.

اسقار دۇيسەنبى بەلگىلى كومپوزيتور ارمان دۇيسەنوۆپەن شىعارماشىلىق بايلانىستا بولعان ەدى. ديماش قۇدايبەرگەن, قايرات نۇرتاس, تامارا اسار سىندى انشىلەردىڭ ورىنداۋىنداعى اندەرگە ءسوز جازعان اقىن. قازىرگى جاستاردىڭ تالعامىنا ساي بولۋعا جۇرەكسىنسە دە, ۇسىنىس تۇسسە, بۇل باعىتتا قالام تەربەۋگە دايىن ەكەنىن جەتكىزدى.