«اقىندارعا رەنىشىم بار»: دۋلات يسابەكوۆ اقىنداردى سىنعا الدى

دۋلات يسابەكوۆ قر ەكس-پرەزيدەنتى نۇرسۇلتان نازارباەۆتى بيلىكتەن كەتكەن سوڭ سىناعاندارعا رەنىشى بارىن ايتتى.

«Kultobe Podcast» YouTube ارناسىندا بەلگىلى جازۋشى, دراماتۋرگ دۋلات يسابەكوۆ سۇحبات بەردى. ول ەكس-پرەزيدەنتتى داتتاعانداردى سىنادى.

«مەن ول كىسى تۋرالى ءبىر پىكىردەمىن. ءوتتى, كەتتى. سول كەزدە پوەما جازعان ادامدار ەندى سونى سىناي باستادى. دەمەك, ادامنىڭ ەكىجۇزدىلىگى دەگەن – وسى. مەن سول كەزدە ماقتاپ, ەشقانداي پىكىر ايتقان ەمەسپىن», – دەدى دۋلات يسابەكوۆ.

جازۋشى نازارباەۆتى ماقتاپ ولەڭ جازعانداردى دا سىنعا الدى.

«كوزى ءتىرى كەزىندە پوەما جازىپ, كەيىن جالت ەتىپ بۇلاي شىعا كەلۋ – ادامنىڭ قاسيەتسىزدىگى, ەكىجۇزدىلىگى. اسىرەسە, اقىندارعا رەنىشىم بار. بيلىكتەگى ءتوتاليتاريزمنىڭ كوبىن اقىندار جاساعان ەكەن. قازىر ءستاليننىڭ كەزىندەگى ولەڭدەردىڭ كوبى ەسىمە تۇسەدى, جاتقا بىلەمىن. ال ورىس اقىندارىنىڭ بىرەۋى ستالين تۋرالى ولەڭ جازعان جوق. تەك قازاقتار عانا جازدى», – دەدى ول.