جاڭالىقتار
الاياقتىق: ءىلياس ساريەۆكە قاتىستى سوت وتىرىسى ءوتىپ جاتىر
فوتو: اشىق دەرەككوز
الماتى قالاسىنىڭ المالى اۋداندىق سوتىندا اسا ءىرى كولەمدەگى الاياقتىق ءىسى بويىنشا ءىلياس ساريەۆ پەن اقتوتى دۇيسەەۆاعا قاتىستى سوت وتىرىسى ءوتىپ جاتىر, دەپ جازدى qandastar.kz
پروكۋرور ەكى ايىپتالۋشىعا قاتىستى ايىپتاۋ اكتىسىن وقىپ شىققاننان كەيىن سۋديا ەرنار قاسىمبەكوۆ ولاردان كىنانى قانشالىقتى مويىندايتىنىن سۇرادى.
تەرگەۋ بارىسىندا 26 قىلمىستىق ەپيزود انىقتالىپ, ولار ءبىر وندىرىستە بىرىكتىرىلگەن. سوتتا ءى.ساريەۆ كىناسىن 26 ەپيزودتىڭ تەك التاۋى بويىنشا مويىندادى. ەكىنشى ايىپتالۋشى اقتوتى دۇيسەەۆا دا كىناسىن ءىشىنارا مويىندادى — ول «MM Travel» تۋريستىك فيرماسىنا بايلانىستى ەپيزودتار بويىنشا ايىپتاۋعا كەلىستى.
ەكى ايىپتالۋشىعا قر قىلمىستىق كودەكسىنىڭ 190-بابىنىڭ 3-بولىگى 4-تارماعى («اسا ءىرى مولشەردە بىرنەشە رەت جاسالعان الاياقتىق») بويىنشا ايىپ تاعىلىپ وتىر.
بۇعان دەيىن سوتتا مەملەكەتتىك ايىپتاۋشى قىلمىستىق ءىس بويىنشا ايىپتاۋ اكتىسىن وقىدى.
ەسكە سالايىق, ءساۋىر ايىندا «ەلگە كومەك» قايىرىمدىلىق قورىنىڭ باسشىسى ءىلياس ساريەۆ الاياقتىق جاسادى دەگەن كۇدىككە ءىلىنىپ, ۇستالعانىن جازعانبىز. ول ءوزىن بىرنەشە رەت «قازاقتىڭ روبين گۋدى» دەپ اتاعان جانە الەۋمەتتىك جەلىدەگى پاراقشالارىندا مۋزىكانت, كونتسەرت پەن توي ۇيىمداستىرۋشى ەكەنى كورسەتىلگەن.
