«الدانىپ قالىپ, پاتەر جالداپ ءجۇر»: روزا القوجا نۇرعالي ءنۇسىپجانوۆتىڭ قازىرگى جاعدايى تۋرالى ايتتى

فوتو: اشىق دەرەككوز

بەلگىلى ءانشى, سازگەر روزا القوجا حالىق ءارتىسى نۇرعالي نۇسىپجانوۆقا سالەم بەرىپ قايتتى. بۇل تۋرالى ول الەۋمەتتىك جەلىدەگى پاراقشاسىندا حابارلادى. 

«سازگەر, ءانشى, ۇستاز باعلان ءبابىجان قۇربىمىز ءبىرازدان بەرى «اعاعا بارىپ قايتايىق» دەپ جۇرگەن. كەشە سونىڭ ءساتى ءتۇستى. حالىق ءارتىسى, بۇگىنگىنىڭ اڭىزى نۇرعالي ءنۇسىپجانوۆ اعامىزعا سالەم بەرىپ باردىق. بيىل ساحنادا جۇرگەنىنە 70 جىل تولادى ەكەن. ءوزى 87-گە كەلىپتى. اعا جەر ءۇي ساتىپ السام دەپ جيناعان بار اقشاسىن شاۋىلدىردەن كەلگەن ءبىر الاياققا بەرىپ, ەندى سونى الا الماي پاتەردە ءجۇر ەكەن,» – دەپ اڭگىمەسىن باستادى ءانشى.

سونىمەن قاتار, ونەر يەسى حالىق ءارتىسىنىڭ ەڭ ۇلكەن ارمانى تۋرالى دا ايتىپ قالدى.

«ەكى ايەلدەن بەس قىز كورگەن بۇل كىسىنىڭ ورىندالماعان ارمانى – ۇلدى بولۋ. ۇرپاعىنىڭ جالعاسىن كورگىسى كەلەدى ەكەن. جاس جەڭگەمىز دە ەكو-نىڭ بار عالاماتىن كورىپ باققان, بولماپتى. ەندىگى بار ءۇمىتى – بالا اسىراپ الىپ, اعانىڭ اتىنا جازدىرۋ. بالاداي ماپەلەپ كۇتىپ جۇرگەن بۇرىنعى ءجۋرناليستى دە ايادىم. نۇرعالي ءنۇسىپجانوۆ الەمىنە بويلاپ, جازۋ-سىزۋىن دا ۇمىتىپتى. قايتپەك كەرەك?! اللا ماڭدايعا بەرگەن بولسا ءبارى دە بولار,» – دەدى روزا القوجا.