Alekseı Lýenko: Kásibı mansabymdy «Astana» komandasynda odan ári jalǵastyratynyma óte qýanyshtymyn

«Adyrna» ulttyq portalynyń tilshisi jýyrda ǵana kelisimshartyn uzartqan «Astana Qazaqstan Team» velokomandasynyń shabandozy Alekseı Lýenkomen suhbattasqan bolatyn, sony nazarlaryńyzǵa usynamyz:

– Alekseı Aleksandrovıch, velosportqa qalaı keldińiz?

Meniń alǵashqy jattyqtyrýshym Potapov boldy. Naqty esimde joq 2006 nemese 2005 jyly aýyldan keldik. Velosport úıirmesine jazylyp, alǵashqy velosıpedimdi aldym. Sport ınternatyna kelgennen bastap, jaqsy nátıjeler kórine bastady. Osylaısha, velosportqa tústim.

– Sizdiń sońǵy jarysyńyz ıtalıandyq «Serenıssıma Gravel» qıyrshyq tas jolynda boldy. Onda siz maýsymdaǵy ekinshi jeńisińizge qol jetkizdińiz. Sizden basqa, «Astananyń» atynan úsh ıtalııalyq shabandoz – Fabıo Fellıne, Samýela Battıstella jáne Davıde Martınellı óner kórsetti. Osy jarys týraly jáne jeńis kezindegi sezimińiz týraly aıtyp berińizshi?!

«Astana Qazaqstan Team» velokomandasynda óner kórsetý kez kelgen qazaqstandyq sportshy úshin úlken mártebe. Onyń ústine ár eldiń óziniń jeke kásibı komandasy bola bermeıdi. Sondyqtan álemdik velododalarǵa qatysý múmkindigi joǵary, sondaı-aq el namysyn laıyqty deńgeıde qorǵaý men úshin de mańyzdy. Jeńis sátindegi sezimim týraly aıtar bolsam, kádimgi sezim, qabyldaýym qarapaıym. Bul sport, bul jarys, birde jeńis, endi birde jeńilis bolady. Árıne, qıyrshyq tas jolynda baq synadym. Men úshin bul jarys qıynǵa soqty. О́ıtkeni qıyrshyqty tasjol qarapaıym jarys jolynan ózgesherek. Sonymen qatar joldar tar ári burylystar sany kóbirek. Al mundaı jaǵdaıda velosıpedti basqarý qıyn. Biraq bári oıdaǵydaı ótti.

– Velosıped Nur-Sultanda tanymal kólik quralyna aınalýda. Jańadan bastap jatqandarǵa jáne velosıped áýesqoılaryna qandaı keńester beresiz?

Aıtarym, velosportpen jıi jattyǵyńyz. Eger sizge velosport kóbirek unaıtyn bolsa. Ásirese Nur-Sultan qalasynda. Biraq qazirgi ýaqytta aýa raıy múmkindik bermeıdi. Biraq velotrekke kelip jattyǵý múmkindigi bar.

– Jańa maýsymnan ne kútesiz? Qazir sporttyq jıynda júrsiz, kúnińiz qalaı ótedi? Kún tártibi qalaı?

Birinshiden, men kásibı mansabymdy qazaqstandyq «Astana» komandasynda odan ári jalǵastyratynyma óte qýanyshtymyn. Komandada ótkizgen jyldar ishinde men kóshbasshy deńgeıine deıin jettim. Endi men ári qaraı damýdy jalǵastyrý úshin jaýapkershilik, yntalandyrý, jańa jetistikterge umtylý jáne kóshbasshylyǵymdy ár joly jańa jeńistermen dáleldeýim kerek. Bıyl jalpy eseptegi saıysta, sondaı-aq «Krıterıým dıý Dofıne» men Grand-Týrlar sııaqty úlken aptalyq jarystarda jaqsy nátıje kórsettim. «Týr de Franstyń» jalpy esebinde jetinshi oryn ıelengenim bolashaqta jeńis tuǵyrynan kórinýge meni jigerlendiredi. Sonymen, jańa maýsymdy «Astana» komandasymen birge jańa maqsattarmen bastaımyn. Joba menedjerlerimen jáne bapkerlermen birge negizgi maqsattardy durys aıqyndaı alatynymyzǵa senimdimin. Sodan keıin biz qalaǵan maqsatymyzǵa jetý úshin bar kúshimizdi salamyz. Qazirgi ýaqytta jıyndarǵa qatysyp júrgen joqpyn. Otbasymmen shaǵyn demalystamyn.

Eske sala keteıik, komandanyń 28 jastaǵy jetekshisi aldaǵy úsh maýsym boıy (2022-2024) ulttyq velojobanyń namysyn qorǵaıtyn bolady.

«Astana» kásibı sport klýbynyń bas seriktesi – «Samuryq-Qazyna» UÁQ» AQ, quryltaıshysy – Týrızm ındýstrııasy men sportty qoldaý qory

Oralbaı MERGENBAIULY