جاڭالىقتار
الەم ەلدەرى تاعى دا «شايقالا باستادى»: قاتاردا قانشا قازاقستاندىق بار?
فوتو: ria ru
ءماجىلىس دالىزىندە جۋرناليستەر سىرتقى ىستەر ءمينيسترىنىڭ ورىنباسارى الىبەك باقاەۆتان قاتار استاناسىندا زارداپ شەككەندەر اراسىندا قازاقستاندىقتاردىڭ بار-جوعى جونىندە سۇرادى, دەپ حابارلايدى qandastar.kz Dalanews.kz-كە سىلتەمە جاساپ.
ءسىم پىكىرى
«زارداپ شەككەندەر جوق. بىزگە حابار تۇسكەن جوق. قازىرگى تاڭدا قاتاردا شامامەن 1500 وتانداسىمىز ءجۇر», – دەدى الىبەك باقاەۆ.
ونىڭ ايتۋىنشا, ولاردىڭ 516-سى كونسۋلدىق ەسەپكە الىنعان جانە ديپلوماتتار ولارمەن تۇراقتى بايلانىستا.
وقيعانىڭ انىق-قانىعى
9 قىركۇيەكتە يزرايل دوحاعا سوققى جاسادى. شابۋىل نىساناسىنا اقش-تىڭ گازاداعى سوعىستى توقتاتۋ جونىندەگى ۇسىنىسىن تالقىلاۋ ءۇشىن كەلگەن حاماس دەلەگاتسياسى ورنالاسقان تۇرعىن ۇيلەر ىلىككەن. بۇل قادامدى قاتار قاتاڭ ايىپتادى.
قازاقستاننىڭ رەاكتسياسى
پرەزيدەنت قاسىم-جومارت توقاەۆ تا قاتار استاناسى دوحادا يزرايل بيلىگى جاساعان اسكەري اكتسيانى ايىپتادى.
«قانداي ماقساتتى كوزدەسە دە, مۇنداي ارەكەتكە جول بەرۋگە بولمايدى. بۇل قاتار مەملەكەتىنىڭ ەگەمەندىك قۇقىعىن بۇزادى جانە حالىقارالىق قۇقىق قاعيداتتارىنا قايشى كەلەدى», — دەدى توقاەۆ.
