الەمدەگى ەڭ قۇرعاق شولگە قار جاۋدى

جەر بەتىندەگى ەڭ قۇرعاق جەر بولىپ سانالاتىن چيليدەگى اتاكاما شولىندە قار جاۋدى. بۇل ءشولدىڭ كەيبىر ايماقتارىندا ءتىپتى جاڭبىر دا جاۋمايدى, دەپ حابارلايدى Qandastar.kz اقپارات پورتالى.

بۇل تۋرالى وسى ايماقتا ورنالاسقان حالىقارالىق ALMA وبسەرۆاتورياسى حابارلادى.

«سەنۋ قيىن! چيليدەگى الەمنىڭ ەڭ قۇرعاق ءشولى – اتاكامانى قار باستى!» – دەپ جازدى ALMA قىزمەتكەرلەرى X الەۋمەتتىك جەلىسىندە.

اتاكاما ءشولى تەڭىز دەڭگەيىنەن ەكى مىڭ مەتردەن استام بيىكتىكتە ورنالاسقان جانە وتە از جاۋىن-شاشىن الادى – كەيبىر ايماقتارىندا جاڭبىر 10–15 جىل بويى مۇلدەم جاۋمايدى. سوندىقتان مۇنداعى قار جاۋى – ناعىز تابيعي قۇبىلىسقا اينالدى.

ALMA دەرەكتەرىنە سۇيەنسەك, وبسەرۆاتوريا ماڭىندا وسىنداي قار شامامەن ون جىل بۇرىن جاۋعان. ال سوڭعى ءىرى قار 2011 جىلى تىركەلگەن – سول كەزدە كەي جەرلەرگە 80 سانتيمەترگە دەيىن قار تۇسكەن (سۇيىق كۇيدەگى 1 مم جاۋىن-شاشىن 1–1,5 سم قار جامىلعىسىنا تەڭ بولۋى مۇمكىن).

اۋا رايىنىڭ كۇرت وزگەرۋ سەبەپتەرى ازىرگە ناقتىلانعان جوق. دەگەنمەن, مۇنداي قۇبىلىستار تىنىق مۇحيتىنان كەلەتىن سيرەك اتموسفەرالىق فرونتتارمەن نەمەسە جاھاندىق جىلىنۋدىڭ سالدارىمەن بايلانىستى بولۋى مۇمكىن.