الەمگە ايگىلى پاۆەل دۋروۆ قازاق بالالارىن تەگىن وقىتپاق

فوتو: اشىق دەرەككوز

الەمگە ايگىلى تەلەگرام جەلىسىنىڭ نەگىزىن قالاۋشى پاۆەل دۋروۆ قازاق بالالارىن تەگىن وقىتادى. بۇل جايىندا IQanat جوباسىنىڭ يدەيا اۆتورى, نەگىزىن قالاۋشى جانە باس دەمەۋشىسى – ەلىمىزگە بەلگىلى كاسىپكەر ايدىن راحىمباەۆ مالىمدەدى, دەپ حابارلايدى Alash.kz ۇلتتىق پورتالىTurkistan.kz سايتىنا سىلتەمە جاساپ. 

اتاقتى پاۆەل دۋروۆ اۋىل بالالارىنا IQanat مەكتەبىنە 356 000 دوللار كولەمىندە 12 گرانت ءبولدى.

«قازاقستانعا, سونىڭ ىشىندە بۋرابايعا كەلگەن پاۆەل Google Map-تە ءبىزدىڭ مەكتەپتى كورىپ, قىزىعۋشىلىق تانىتقان ەدى. ونىڭ ءوتىنىشىن بىردەن قابىل الدىق. ساپار بارىسىندا ول وقۋ پروتسەسى جايلى ەگجەي-تەگجەيىن سۇراي باستادى, ون مىڭداعان اۋىل بالالارىنىڭ قاي فورماتى تاڭدالاتىنىن بىلگىسى كەلدى. ونىڭ قىزىعۋشىلىعى ارتىپ, كوپ سۇراق قويدى. ءبىر كەزدەرى ول دارىندى بالالارعا ارنالعان مەكتەپتى ءوزى بىتىرگەن ەكەن. مەنى تاڭقالدىرعانى, ول مەكتەپتە ۇزاق ۋاقىت بولدى جانە مەكتەپتىڭ وقۋ ەرەكشەلىكتەرىمەن ەگجەي-تەگجەيلى تانىستى. وقۋ جىلدارىندا اۋىلدان كەلگەن قاراپايىم بالالاردىڭ قانشالىقتى وزگەرەتىنىن بىلگەن ول گرانتقا تۇسە الماعان بىرنەشە بالانىڭ وقۋ اقىسىن تولەپ بەرگىسى كەلەتىنىن ايتتى», – دەپ جازدى ايدىن راحىمباەۆ.

ونىڭ ايتۋىنشا, پاۆەل دۋروۆ ءوزى ۇسىنعان گرانتقا لايىق اۋىل بالالارىن ءوزى زەرتتەپ, ىرىكتەۋگە قاتىسقان.

«كەلەسى ەكى اپتادا ءبىز ونىمەن بەلسەندى تۇردە حات جازىستىق. ول ۇمىتكەرلەردى جەكە ءوزى سۇرىپتاپ, ولاردىڭ ۇپايلارىن جانە ودان دا باسقا قوسىمشا اقپاراتتى سۇراعان كەزدە مەن قاتتى تاڭ قالدىم.. ەلەستەتىپ كورىڭىزشى, 15 ميلليارد دوللاردان استام بايلىعى بار ادام, الەمنىڭ 100 ەلىندە حالىقارالىق كورپوراتسيانىڭ يەسى سانالاتىن تۇلعا ءوزى ءۇشىن كىشكەنتاي بولىپ كورىنەتىن, بىراق ماڭىزدى ىسپەن اينالىسىپ وتىر. ول بالالار تۋرالى كوبىرەك بىلگەننەن كەيىن گرانتتار سانىن 12-گە ارتتىردى!», –  دەدى جازبا اۆتورى.

ايتا كەتەيىك, «ۆكونتاكتە» الەۋمەتتىك جەلىسىنىڭ جانە Telegram مەسسەندجەرىنىڭ نەگىزىن قالاۋشى پاۆەل دۋروۆتا بالا كۇنىندە وسىعان ۇقساس دارىندى بالالار مەكتەبىندە ءبىلىم العان