جاڭالىقتار
ءاليا يۋسۋپوۆا باپكەر قىزمەتىنەن كەتتى
ول 2012 جىلدان باستاپ قازاقستان قۇراماسىن باسقارىپ, وتاندىق كوركەم گيمناستيكانى جاڭا دەڭگەيگە شىعاردى.
ونىڭ جەتەكشىلىگىمەن قازاقستاندىق گيمناستتار حالىقارالىق ارەنالاردا تابىستارعا جەتىپ, قۇرلىقتىق چەمپيوناتتاردا, ازيا ويىندارىندا جانە الەمدىك تۋرنيرلەردە مەدالدار جەڭىپ الدى.
ءاليا يۋسۋپوۆانىڭ ايتۋىنشا, بۇل شەشىم قازاقستان گيمناستيكا فەدەراتسياسىنداعى جۇمىسىنا تولىعىمەن كوڭىل بولگىسى كەلگەنىمەن بايلانىستى.
«2009 جىلى سپورتتىق مانسابىمدى اياقتاعان سوڭ, ءوزىمدى باپكەرلىك قىزمەتتە سىناپ كورگىم كەلدى. مەن ءوزىم دايىنداعان گيمناستتى وليمپياداعا شىعارىپ, سول ويىندارعا باپكەر رەتىندە قاتىسۋدى ماقسات ەتتىم. 2012 جىلى ماعان وسىنداي مۇمكىندىك بەرىلىپ, قازاقستان قۇراماسىنىڭ باس باپكەرى قىزمەتىنە كىرىستىم. ءۇش وليمپيادا دا ءبىز جاقسى ناتيجەلەر كورسەتە الدىق. ءۇش رەت گيمناستتاردى وليمپياداعا دايىنداعانىما وتە قۋانىشتىمىن. مۇنداي جاۋاپتى قىزمەتتە ماعان سەنىم ارتقانى ءۇشىن ەلگە, باسشىلىققا العىسىمدى بىلدىرەمىن. 2025 جىلدىڭ قاڭتارىنان باستاپ باس باپكەر قىزمەتىنەن كەتەمىن, ويتكەنى فەدەراتسياداعى جۇمىسقا تولىقتاي كوڭىل بولگىم كەلەدى. وسىلايشا, باسقا باپكەرلەرگە وزدەرىن كورسەتۋگە مۇمكىندىك بەرۋدى ءجون كوردىم. بارشاڭىزعا ساتتىلىك تىلەيمىن».ءاليا يۋسۋپوۆا
ايتا كەتەيىك, ءاليا يۋسۋپوۆا – قازاقستان رەسپۋبليكاسىنىڭ ەڭبەك سىڭىرگەن سپورت شەبەرى جانە ەڭبەك سىڭىرگەن باپكەرى. ول ەكى رەت وليمپيادا ويىندارىندا ونەر كورسەتتى. 2004 جىلى افينادا يۋسۋپوۆا جۇلدەدەن ءبىر قادام قالىس قالعان بولسا, 2008 جىلى بەيجىڭدە بەسىنشى ناتيجە كورسەتتى.
ونىڭ باسشىلىعىمەن ءۇش سپورتشى وليمپيادا ويىندارىنا جولداما الدى. 2016 جىلى سابينا اشىرباەۆا, 2020 جىلى ءالينا ءادىلحانوۆا, ال 2024 جىلى ەلجانا تانيەۆا وليمپيادادا ونەر كورسەتتى.
كوركەم گيمناستيكادان قازاقستان سپورتشىلارى ازيا چەمپيوناتتارىندا, ازيا ويىندارىندا جانە الەم كۋبوگى مەن گران-پري كەزەڭدەرى سەكىلدى بەدەلدى الەمدىك تۋرنيرلەردە جۇلدەلى ورىندارعا يە بولدى.
ءاليا يۋسۋپوۆا «ەرەن ەڭبەگى ءۇشىن», «الەمدىك دەڭگەيدەگى گيمناست» مەدالدارىمەن جانە «قۇرمەت», «پاراسات» وردەندەرىمەن ماراپاتتالعان.
