Jańalyqtar
Álııa Iýsýpova bapker qyzmetinen ketti
Ol 2012 jyldan bastap Qazaqstan quramasyn basqaryp, otandyq kórkem gımnastıkany jańa deńgeıge shyǵardy.
Onyń jetekshiligimen qazaqstandyq gımnasttar halyqaralyq arenalarda tabystarǵa jetip, qurlyqtyq chempıonattarda, Azııa oıyndarynda jáne álemdik týrnırlerde medaldar jeńip aldy.
Álııa Iýsýpovanyń aıtýynsha, bul sheshim Qazaqstan gımnastıka federaııasyndaǵy jumysyna tolyǵymen kóńil bólgisi kelgenimen baılanysty.
«2009 jyly sporttyq mansabymdy aıaqtaǵan soń, ózimdi bapkerlik qyzmette synap kórgim keldi. Men ózim daıyndaǵan gımnastty Olımpıadaǵa shyǵaryp, sol oıyndarǵa bapker retinde qatysýdy maqsat ettim. 2012 jyly maǵan osyndaı múmkindik berilip, Qazaqstan quramasynyń bas bapkeri qyzmetine kiristim. Úsh Olımpıada da biz jaqsy nátıjeler kórsete aldyq. Úsh ret gımnasttardy Olımpıadaǵa daıyndaǵanyma óte qýanyshtymyn. Mundaı jaýapty qyzmette maǵan senim artqany úshin elge, basshylyqqa alǵysymdy bildiremin. 2025 jyldyń qańtarynan bastap bas bapker qyzmetinen ketemin, óıtkeni federaııadaǵy jumysqa tolyqtaı kóńil bólgim keledi. Osylaısha, basqa bapkerlerge ózderin kórsetýge múmkindik berýdi jón kórdim. Barshańyzǵa sáttilik tileımin».Álııa Iýsýpova
Aıta keteıik, Álııa Iýsýpova – Qazaqstan Respýblıkasynyń eńbek sińirgen sport sheberi jáne eńbek sińirgen bapkeri. Ol eki ret Olımpıada oıyndarynda óner kórsetti. 2004 jyly Afınada Iýsýpova júldeden bir qadam qalys qalǵan bolsa, 2008 jyly Beıjińde besinshi nátıje kórsetti.
Onyń basshylyǵymen úsh sportshy Olımpıada oıyndaryna joldama aldy. 2016 jyly Sabına Áshirbaeva, 2020 jyly Álına Ádilhanova, al 2024 jyly Eljana Tanıeva Olımpıadada óner kórsetti.
Kórkem gımnastıkadan Qazaqstan sportshylary Azııa chempıonattarynda, Azııa oıyndarynda jáne Álem kýbogy men Gran-prı kezeńderi sekildi bedeldi álemdik týrnırlerde júldeli oryndarǵa ıe boldy.
Álııa Iýsýpova «Eren eńbegi úshin», «Álemdik deńgeıdegi gımnast» medaldarymen jáne «Qurmet», «Parasat» ordenderimen marapattalǵan.
