جاڭالىقتار
الماتى اكىمدىگىنىڭ 126 ملرد قارىزى انىقتالدى
فوتو: gov.kz
الماتى اكىمدىگىنىڭ 126 ملرد تەڭگە قارىزى بار, دەپ جازادى qandastar.kz
قالانىڭ اۋديت كوميسسياسى 2023 جىلعا تەكسەرىس جۇرگىزدى. سونىڭ بارىسىندا بيۋدجەت قارجىسىن جوسپارلاۋ, پايدالانۋ جانە قايتارۋ بويىنشا ماسەلەلەر انىقتالعان. اۋديتورلار ەسەبىنە سۇيەنسەك, 2015-2023 جىلدار ارالىعىندا الماتى اكىمدىگى 50 رەت كرەديت العان.
2023 جىلدىڭ سوڭىندا ولاردىڭ تەك ۇشەۋىن عانا تولەگەن. 2023 جىلدىڭ 1 قاڭتارىندا قالا اكىمدىگىنىڭ بورىشى 129,84 ملرد تەڭگە بولدى. ءبىر جىل ىشىندە ول قارىزدىڭ 3 ملرد تەڭگەسى عانا تولەندى.
قارىزدى نە ءۇشىن الدى? 32,99 ملرد تەڭگە – رەسپۋبليكالىق بيۋدجەت الدىنداعى قارىزى. 2039 جىلعا دەيىن قازىنادان 10 رەت كرەديت العان. 27,56 ملرد تەڭگەنى «الماتى جىلۋ جۇيەلەرى» كومپانياسى العان. ول قارجى الاتاۋ اۋدانىنداعى 2017 جىلعى ۋنيۆەرسيادا نىساندارىن جىلۋمەن قامتاماسىز ەتۋ ءۇشىن جىلۋ ماگيسترالىنىڭ قۇرىلىسى مەن جەو-2 جىلۋ شىعارۋ جۇيەسىن جاڭالاۋ ءۇشىن قاجەت بولعان. 5,42 ملرد تەڭگەنى «اۋىل شارۋاشىلىعىن قارجىلاي قولداۋ قورى» جانە «اگرارلىق نەسيەلىك كورپوراتسيا» ارقىلى الىپ, جاستار ۇسىنىسى مەن كاسىپكەرلىكتى قولداۋ ءۇشىن جۇمساعان. 93,57 ملرد تەڭگە – 2032 جىلعا دەيىن العان 11 مامىلە بويىنشا كرەديتورلار الدىنداعى قارىز. 11,73 ملرد تەڭگە – ناۋرىزباي اۋدانىنداعى قالقامان-2 اۋدانى مەن تۇركىسىب اۋدانىنداعى جاس قانات شاعىن اۋدانىنىڭ قۇرىلىسى ءۇشىن جۇمسالدى. 81,85 ملرد تەڭگە – «جۇمىسپەن قامتۋ جول كارتاسى» باعدارلاماسى اياسىندا بالاباقشا, كىتاپحانا, مۇراجاي, تەاتردى جوندەۋ جۇمىسىنا, جول جوندەۋگە جانە ت.ب. قۇرىلىستارعا قاجەت بولعان.
بيۋدجەتتى باسقارۋدا ايتارلىقتاي قاتەلىكتەر انىقتالعان. دەگەنمەن اۋديتورلار اكىمدىك كرەديتورلار مەن رەسپۋبليكالىق بيۋدجەت الدىنداعى قارىزىن ۋاقىتىلى جانە گرافيككە ساي تولەپ وتىرعاندىعىن ايتادى.
