Almaty men Nıý-Iork arasynda tikeleı reıs ashylady

2026 jyly Qazaqstanda Almaty-Nıý-Iork baǵytynda reıs ashylmaq, dep habarlaıdy Qandastar.kz.

Syrtqy ister mınıstrliginiń málimetinshe, áýe reısi 2026 jyly ashylady. Bastapqyda bul baǵyt 2025 jyly iske qosylady dep ýáde etilgen edi. Alaıda merzim keıinge shegerildi. Degenmen naqty kún áli belgilengen joq.

«Kelesi jyly Almaty – Nıý-Iork tikeleı reısiniń ashylýy áriptestikti damytýǵa qosymsha serpin berip, bıznes úshin jańa múmkindikter ashady», – dedi Syrtqy ister mınıstriniń orynbasary Álibek Qýantyrov.

AQSh-qa tikeleı reıs ashý týraly áńgimeler 2023 jyldan beri aıtylyp keledi. 2024 jyldyń sáýirinde Qazaqstan men AQSh-tyń avıaııalyq ákimshilikteri kelisimge jaqyndaǵan edi, alaıda ýáde sóz kúıinde qaldy. Sonyń saldarynan qazaqstandyqtar Nıý-Iorkke tikeleı reısti endi 2026 jylǵa deıin kútýge májbúr.

Aıta keteıik, buǵan deıin 2026 jyly Almaty men Tokıo arasynda tikeleı reıs ashylatyny týraly jazǵan edik.