الماتى وبلىسىندا «انامنىڭ بەينەسى» كورمە – بايقاۋى مارەسىنە جەتتى

جەتىسۋ ولكەسىندە «بالالار جىلى» اياسىندا 8-ناۋرىز مەرەكەسى قارساڭىندا مەكتەپ وقۋشىلارى, ستۋدەنتتەر جانە كاسىپقوي سۋرەتشىلەردىڭ تۋىندىلارىنان جيناقتالعان «انامنىڭ بەينەسى» اتتى كورمە-بايقاۋىنىڭ جەڭىمپازدارى انىقتالدى.

يگى شارانىڭ وتۋىنە وبلىستىق مادەنيەت باسقارماسى مەن «كوركەمونەر گالەرەياسى» مۇرىندىق بولدى. بايقاۋدى وتكىزۋدەگى نەگىزگى ماقسات- اناعا دەگەن مەيىرىمدى, سۇيىسپەنشىلىكتى ارتتىرۋ, رۋحاني بايلىقتى مولايتىپ, ۇرپاقتى ۇلتتىق رۋحتا تاربيەلەۋ.

ايتا كەتەيىك, بايقاۋ قاتىسۋشىلارى جاس ەرەكشەلىكتەرى مەن دەڭگەيلەرىنە قاراي توپتاستىرىلعان. قىلقالام شەبەرلەرىنىڭ ەڭ دارىندىسى جۇلدەلى ورىننان تابىلدى. سولاردىڭ ءبىرى – النۋرا تۇرسىنعالي. ونىڭ وتكىزگەن جۇمىسى مەكتەپ وقۋشىلارى اراسىندا ۇزدىك دەپ تانىلعان.

– «مەن مۇنداي بايقاۋعا ءبىرىنشى رەت قاتىسىپ تۇرمىن. ءبىر دەگەننەن جۇلدەلى بولۋ ەرەكشە سەزىم. تۋىندىنى 18 ساعات كولەمىندە سالدىم. بار ىقىلاسىمدى اۋدارعان جۇمىسىمنىڭ وڭ باعالانعانىنا قۋانىپ تۇرمىن. مەنىڭ سۋرەتپەن اۋەستەنگەنىمە 1,5 جىلدىڭ ءجۇزى بولدى. قازىر تەك قارا قارانداشتىڭ كومەگىمەن بەينەلەيمىن. بولاشاقتا مايلى بوياۋمەن سۋرەت سالۋدى مەڭگەرگىم كەلەدى»,-دەيدى جاس سۋرەتشى النۋرا تۇرسىنعالي.

الماتى وبلىستىق مادەنيەت باسقارماسىنىڭ باسشىسى مارلەن قاپاش ۇلىنىڭ ايتۋىنشا, ءۇشىنشى جىل قاتارىنان وتكىزىلىپ وتىرعان كوركەم شارانىڭ كوپكە بەرەرى مول.

«بۇگىن سۋرەتشىلەر اراسىنداعى بايقاۋ ءوز مارەسىنە جەتتى. قىلقالام شەبەرلەرىنىڭ دوداسىن اقپان ايىندا جاريالاعان بولاتىنبىز. ۇزىن-سانى 130 ۇمىتكەر قاتىستى, ونىڭ ىشىندە 10 ستۋدەنت, 21 كاسىبي سۋرەتشى, قالعاندارى مەكتەپ وقۋشىلارى. جالپى جۇلدە قورى -700 مىڭ تەڭگە. الداعى ۋاقىتتا وسى تەكتەس شارالار ءوز جالعاسىن تاباتىن بولادى. ماسەلەن, قابانباي باتىر مەن ەسكەلدى ءبيدىڭ 330 جىلدىعىن ۇشتاستىرا وتىرا پلەنەر وتكىزۋ جوسپارلانعان»,-دەيدى الماتى وبلىسى مادەنيەت, ارحيۆتەر جانە قۇجاتتاما باسقارماسىنىڭ باسشىسى مارلەن كولباەۆ.