الماتى وبلىسىندا قۇس فابريكاسى ورتەنىپ, ءبىر ادام قازا بولدى

الماتى وبلىسىنىڭ ىلە اۋدانىندا ورنالاسقان قۇس فابريكاسى ورتەنگەن, دەپ جازدى Qandastar.kz.

الماتى وبلىسىنىڭ تجد مالىمەتىنشە, 28 شىلدە كۇنى م.تۇيمەباەۆ اۋىلىندا قۇس ەتىنەن تاعام ونىمدەرىن وندىرەتىن كاسىپورىننىڭ اسحاناسىنان ءورت شىققان. وقيعا ورنىنا دەرەۋ قالالىق جانە وبلىستىق تجد قۇتقارۋشىلارى جۇمىلدىرىلعان.

— العاشقى بولىمشەلەر كەلگەن ساتتە ءورتتىڭ ۇلكەن اۋماقتى شارپىعانى انىقتالدى. بارلاۋ بارىسىندا گاز-تۇتىننەن قورعاۋ قىزمەتىنىڭ بولىمشەسى ەر ادامنىڭ ءمايىتىن تاپتى. اشىق جالىندى وشىرۋگە 42 مامان مەن 14 تەحنيكا جۇمىلدىرىلدى. 450 شارشى مەتر اۋماقتا ءورت تولىعىمەن ءسوندىرىلدى. جاقىن ماڭداعى نىساندارعا وتتىڭ تارالۋىنا جول بەرىلمەدى, — دەپ حابارلادى الماتى وبلىسى تجد.

قازىرگى ۋاقىتتا ءورتتىڭ شىعۋ سەبەبى انىقتالىپ جاتىر. اتالعان دەرەك بويىنشا الماتى وبلىسى توتەنشە جاعدايلار دەپارتامەنتىنىڭ انىقتاۋ ءبولىمى قك 292-بابى 2-بولىگى بويىنشا قىلمىستىق ءىس قوزعادى.