Almaty oblysynda qus fabrıkasy órtenip, bir adam qaza boldy

Almaty oblysynyń Ile aýdanynda ornalasqan qus fabrıkasy órtengen, dep jazdy Qandastar.kz.

Almaty oblysynyń TJD málimetinshe, 28 shilde kúni M.Túımebaev aýylynda qus etinen taǵam ónimderin óndiretin kásiporynnyń ashanasynan órt shyqqan. Oqıǵa ornyna dereý qalalyq jáne oblystyq TJD qutqarýshylary jumyldyrylǵan.

— Alǵashqy bólimsheler kelgen sátte órttiń úlken aýmaqty sharpyǵany anyqtaldy. Barlaý barysynda gaz-tútinnen qorǵaý qyzmetiniń bólimshesi er adamnyń máıitin tapty. Ashyq jalyndy óshirýge 42 maman men 14 tehnıka jumyldyryldy. 450 sharshy metr aýmaqta órt tolyǵymen sóndirildi. Jaqyn mańdaǵy nysandarǵa ottyń taralýyna jol berilmedi, — dep habarlady Almaty oblysy TJD.

Qazirgi ýaqytta órttiń shyǵý sebebi anyqtalyp jatyr. Atalǵan derek boıynsha Almaty oblysy Tótenshe jaǵdaılar departamentiniń anyqtaý bólimi QK 292-baby 2-bóligi boıynsha qylmystyq is qozǵady.