الماتى وبلىسىندا پوليتسيا مەملەكەتتىك رامىزدەردى قوقىسقا تاستاعانداردى ىزدەستىرىپ جاتىر

فوتو: ۆيدەودان سكرين

الماتى وبلىسىندا بەلگىسىز بىرەۋلەر مەملەكەتتىك رامىزدەردى دالاعا تاستاعان. قازىر پوليتسيا قىلمىستىق ءىس قوزعاپ, رامىزدەردى قورلاعانداردى ىزدەستىرىپ جاتىر. بۇل تۋرالى qandastar.kz Stan.kz اقپارات اگەنتتىگىنە سىلتەمە جاساپ حابارلايدى.

قوقىستا جاتقان رامىزدەردىڭ ۆيدەوسى الەۋمەتتىك جەلىدە تاراعان. اۆتوردىڭ سوزىنشە, ۆيدەو تالعار اۋدانىنداعى ەركىن اۋىلىندا تۇسىرىلگەن.

«سۇمدىق جاعداي, مەملەكەتتىك رامىزدەر قوقىستا شاشىلىپ جاتىر. بۇل تەك زاڭ بۇزۋشىلىق ەمەس, ەلىمىزگە جانە ونىڭ رامىزدەرىنە كورسەتىلگەن قۇرمەتسىزدىك. ءبىز مەملەكەتتىك ورگاندارعا جۇگىنىپ, تەرگەۋ باستاۋىن جانە كىنالىلەردى انىقتاۋىن تالاپ ەتەمىز. سونىمەن قاتار مۇنداي جايت ەندى قايتالانباۋى كەرەك», – دەدى اۆتور.

جەلى قولدانۋشىلارى اتالعان جايتقا قاتىستى نارازىلىقتارىن ءبىلدىرىپ, مەملەكەتتىك رامىزدەردى جويۋدىڭ ارنايى ءتارتىبى بارىن العا تارتتى.

تالعار اۋدانىنىڭ اكىمدىگى قوقىس پوليگونىنىڭ قاينار اۋىلدىق وكرۋگىندەگى جەكەمەنشىك اۋماقتا ورنالاسقانىن مالىمدەدى. رامىزدەر بۇگىندە قوقىستان شىعارىلعان.

«جەرگىلىكتى اتقارۋشى ورگان قىزمەتكەرلەرى قوقىستى تەكسەردى. تەكسەرىس بارىسىندا مەملەكەتتىك رامىزدەرمەن بىرگە كوللەدج قۇجاتتارى تابىلدى. رامىزدەر قوقىستان شىعارىلدى. جويۋ جۇمىستارى مەملەكەتتىك تۋ مەن ءرامىزدى اۋىستىرۋ جانە جويۋ ەرەجەسىنە سايكەس جۇرگىزىلەدى», – دەدى تالعار اۋدانىنىڭ اكىمدىگى.

ۆەدومستۆو وكىلدەرى مەملەكەتتىك رامىزدەردىڭ تالعار اۋدانىنداعى مەكەمەلەرگە ءتيىستى ەمەسىن حابارلادى.

ال پوليتسيا قىلمىستىق ءىس قوزعاپ, تەكسەرىس جۇرگىزىپ جاتىر.

«مەملەكەتتىك رامىزدەردى قورلاۋ دەرەگى بويىنشا قىلمىستىق ءىس قوزعالدى. قازىر تالعار اۋداندىق پوليتسيا قىزمەتكەرلەرى ءمان-جايدى انىقتاۋ ءۇشىن ءتيىستى شارالار قابىلداپ جاتىر. كىنالىلەرگە قاتىستى ءتيىستى شارا قولدانىلادى», – دەلىنگەن پوليتسيا حابارلاماسىندا.