الماتى وبلىسىندا رەسپۋبليكالىق كۇيشىلەر بايقاۋى وتەدى

ايتۋلى شارا الماتى وبلىسى اكىمدىگىنىڭ قولداۋىمەن جانە مادەنيەت, ارحيۆتەر جانە قۇجاتتاما باسقارماسى, وبلىستىق حالىق شىعارماشىلىعى ورتالىعىنىڭ ۇيىمداستىرۋىمەن وتكىزىلمەك.
العاشقى رەت ۇيىمداستىرىلعان بايقاۋ 16 تامىز كۇنى قوناەۆ قالاسىندا وتەدى.

اتالمىش بايقاۋعا ەلىمىزدىڭ الماتى,استانا قالالارىنان,باتىس قازاقستان, اباي, قىزىلوردا, جەتىسۋ,قاراعاندى,الماتى وبلىسىنان كەلگەن 17 دارىندى كۇيشى باق سىنايدى. ەكى كەزەڭنەن تۇراتىن سايىستا قاتىسۋشىلار بيلەت تاڭداۋ ارقىلى شىعارما ورىنداسا,اقتىق كەزەڭدە جەكە دايىنداپ كەلگەن تۋىندىلارىن كورەرمەن نازارىنا ۇسىنادى.

“كۇي ونەرىنە جەڭىل-جەلپى ادامدار بارا المايدى, جۇرەگىنىڭ تۇگى بار, رۋحاني قازىناسى مول ادام عانا كۇي سالاسىنا قادام باسادى. ول ۇلكەن قۇرىلىمنان تۇراتىن ەكى شەكتى دومبىرا ارقىلى حالىقتىڭ مۇڭىن,زارىن, قۋانىشىن, جەتكىزەتىن ۇلى دۇنيە. بابالار مۇراسىن دارىپتەپ, ءداۋىردىڭ ءۇنىن دومبىرامەن جەتكىزىپ جۇرگەن جاس ونەرپازدارعا ساتتىلىك تىلەيمىن”-دەيدى الماتى وبلىسىنىڭ مادەنيەت, ارحيۆتەر جانە قۇجاتتاما باسقارماسىنىڭ ءبولىم باسشىسى تۋلەۋجان عۇماروۆ.

دومبىرانىڭ قۇلاعىندا ويناعان كۇيشىلەرگە قازاقستانعا ەڭبەگى سىڭگەن تانىمال كۇيشى, كومپوزيتورلارى قازىلىق ەتەدى. ۇمىتكەرلەردىڭ ونەرىن باعالاۋ كەزىندە تورەشىلەر ورىنداۋشىلىق شەبەرلىگىنە, شىعارمانىڭ كۇردەلىلىگىنە, ساحنا مادەنيەتى مەن ۇلتتىق كيىمىنە باسا نازار اۋداردى.

ايتا كەتەيىك, 17 تامىز رايىمبەك اۋدانىندا ايگىلى كۇيشى-كومپوزيتور قوجەكە نازار ۇلىنىڭ تۋعانىنا 200 جىل تولۋىنا ارنالعان حالىق ونەرىن زەرتتەۋشى عالىم ساعاتبەك مەدەۋبەك ۇلىنىڭ «قوجەكەنىڭ كۇي مەكتەبى» اتتى ءدارىس-كونتسەرتى وتەدى.