الماتى وبلىسىندا ءجاسوسپىرىم قىزدار قۇرداسىنا قىسىم كورسەتىپ, اقشا بوپسالاعان

فوتو: اشىق دەرەككوز

الماتى وبلىسىندا ءجاسوسپىرىم قىزدار وزدەرى قاتارلاس قىزعا قىسىم كورسەتىپ, ودان اقشا بوپسالاعان. بۇل تۋرالى ءوڭىردىڭ پوليتسيا دەپارتامەنتىنىڭ باستىعى باۋىرجان الەنوۆ مالىمدەدى, – دەپ حابارلايدى Massaget.kz ءتىلشىسى.

قاراساي اۋدانىنىڭ پوليتسيا قىزمەتكەرلەرى 15 جاستاعى وقۋشىدان اقشا بوپسالاۋعا قاتىسى بار كامەلەتكە تولماعان قىزداردىڭ اتا-انالارىن انىقتاپ, جاۋاپقا تارتتى.

«تەرگەۋ بارىسىندا كامەلەتكە تولماعان قىزدار قۇرداسىنا پسيحولوگيالىق قىسىم كورسەتىپ, ودان اقشا تالاپ ەتكەنى انىقتالدى. قۇقىقبۇزۋشىلاردىڭ جاسىن ەسكەرە وتىرىپ, پوليتسيا اتا-انالارىن بالا تاربيەسى بويىنشا مىندەتتەرىن ورىنداماعانى ءۇشىن جاۋاپقا تارتۋ بويىنشا جۇمىس جۇرگىزدى», – دەپ جازىلعان حابارلامادا.

بۇل دەرەك قاراساي اۋدانىنىڭ پوليتسيا باسقارماسىندا تىركەلدى, ءىس ماتەريالدارى ودان ءارى قاراۋ ءۇشىن سوتقا جونەلتىلدى.