الماتى وبلىسىنىڭ اكىمى قانشا جالاقى الادى?

الماتى وبلىسى اكىمى مارات سۇلتانعازيەۆتىڭ قانشا جالاقى الاتىنى بەلگىلى بولدى, دەپ جازدى qandastar.kz.

الماتى وبلىسى اكىمىنىڭ ءباسپاسوز قىزمەتىنىڭ جەتەكشىسى جاننا ارىنبەكوۆانىڭ ايتۋىنشا, ايماق باسشىسىنىڭ جالاقىسى 2 ميلليون تەڭگەدەن اسادى. بۇل سومانى ول مەملەكەتتىك قىزمەتتەگى 20 جىلعا جۋىق تاجىريبەسىنىڭ ارقاسىندا الىپ وتىر.

«وبلىس اكىمىنىڭ ەڭبەگىنە اقى تولەۋ قازاقستان رەسپۋبليكاسى ۇكىمەتىنىڭ 2017 جىلعى 16 قازانداعى «وبلىس بيۋدجەتى ەسەبىنەن ۇستالاتىن بارلىق ورگانداردىڭ قىزمەتكەرلەرىنە ەڭبەكاقى تولەۋدىڭ بىرىڭعاي جۇيەسىن بەكىتۋ تۋرالى» قاۋلىسى نەگىزىندە ەسەپتەلەدى. مەملەكەتتىك ساياسي جانە اكىمشىلىك قىزمەتشىلەرگە ەڭبەكاقى تولەۋ سحەماسىنا سايكەس, الماتى وبلىسى اكىمىنىڭ لاۋازىمدىق جالاقىسى 18 جىلدان جوعارى جۇمىس ءوتىلىن ەسكەرە وتىرىپ, 2 414 264 تەڭگەنى قۇرايدى», – دەدى وبلىس اكىمىنىڭ ءباسپاسوز حاتشىسى.