الماتى پوليتسياسى inDrive-تان قاۋىپسىزدىكتى قامتاماسىز ەتۋدى تالاپ ەتتى

فوتو: اشىق دەرەككوز

الماتى پوليتسياسى جاڭا وقۋ جىلىندا تاسىمالداۋشىلاردان جولاۋشىلاردىڭ قاۋىپسىزدىگىن قامتاماسىز ەتۋدى تالاپ ەتتى, دەپ جازدى qandastar.kz

الماتى قالاسى پوليتسيا دەپارتامەنتىندە اۆتوبۋس پاركتەرى, تاكسوپاركتەر جانە تاكسي اگرەگاتورلارى باسشىلارىنىڭ قاتىسۋىمەن جيىن ءوتتى.

جاڭا وقۋ جىلىنداعى بالالاردىڭ جولداعى قاۋىپسىزدىگى كەزدەسۋدىڭ نەگىزگى تاقىرىبى بولدى.

پوليتسيانىڭ مالىمەتىنشە, 2025 جىلدىڭ باسىنان بەرى قازاقستاندا جول-كولىك وقيعالارىنان 190 بالا قازا تاۋىپ, 7 مىڭ 508 بالا ءارتۇرلى دەنە جاراقاتىن العان. الماتى قالاسىندا 2 بالانىڭ قازا تابۋ دەرەگى جانە 1 202 كامەلەتكە تولماعان بالا جاراقات العانى تىركەلدى.

«ستاتيستيكا ءۇشىن بۇل ءجاي ساندار بولسا, ال وتباسى ۇشىن – قايعى مەن قاسىرەت. قازا بولعان ەكى بالا – ورنى تولماس قايعى. الماتىدا مىڭنان استام بالا فيزيكالىق جانە پسيحولوگيالىق جاراقات العان, سوندىقتان بالاعا قاتىستى بولعان ءاربىر جول-كولىك وقيعاسى ورنى تولماس قاسىرەت», – دەدى, اكىمشىلىك پوليتسيا باسقارماسىنىڭ باستىعى اسحات كۇلباەۆ.

azh.kz حابارلاعانداي, پوليتسيا تاسىمالداۋشىلارعا قىسقا مەرزىم ىشىندە كولىكتەردىڭ تەحنيكالىق جارامدىلىعىن تولىق تەكسەرۋدى, اسىرەسە تەجەگىش جۇيەسىنە, جارىق شامدارىنا, قاۋىپسىزدىك بەلدىكتەرىنە جانە بالالارعا ارنالعان ۇستاپ تۇراتىن قۇرىلعىلاردىڭ بولۋىنا ەرەكشە نازار اۋدارۋدى مىندەتتەدى. 1 قىركۇيەكتەن باستاپ جالپى ءبىلىم بەرۋ مەكتەپتەرىنىڭ ماڭىندا رەيدتىك ءىس-شارالار باستالادى. قۇقىقبۇزۋشىلىق انىقتالعان جاعدايدا اكىمشىلىك شارا قابىلدانادى دەيدى پوليتسيا ماماندارى.

جيىننىڭ ءبىر بولىگى تاكسي اگرەگاتورلارىنىڭ قىزمەتىنە ارنالدى. اسحات قۇلباەۆتىڭ ايتۋىنشا, كومپانيا كەيبىر ماڭىزدى فۋنكتسيالاردى ورىنداماي, جولاۋشىلاردىڭ قاۋىپسىزدىگىنە تىكەلەي قاۋىپ ءتوندىرىپ وتىر.

«بۇگىنگى تاڭدا “Indrive” ءوز جۇرگىزۋشىلەرى مەن كولىكتەرىن باقىلامايدى, قاۋىپتى  كولىكتەردىڭ قولدانىلۋىنا جول بەرەدى جانە جولاۋشىلاردى قورعاۋدىڭ قاراپايىم تەتىكتەرى جوق. سىزدەردە جەدەل بايلانىس جەلىسى, شۇعىل كومەك باتىرماسى, باعىتتى قاداعالاۋ جۇيەسى جوق. بۇل – جول بەرۋگە بولمايتىن جاعداي. ءبىز سىزدەردەن سىلتاۋ ەمەس, ناقتى شەشىم كۇتەمىز. ەگەر وزگەرىس بولماسا, زاڭناما دەڭگەيىندە شارالار قابىلدانادى. ءبىز ناقتى تۇسىنىكتەمە مەن انىقتالعان بۇزۋشىلىقتاردى جويۋ جونىندەگى ناقتى جوسپاردى كۇتەمىز», – دەدى, پولكوۆنيك قۇلباەۆ.

جيىن قورىتىندىسى بويىنشا بارلىق تاسىمالداۋشىلار مەن اگرەگاتورلارعا جەدەل تۇردە قاۋىپسىزدىكتى قامتاماسىز ەتۋ بويىنشا قابىلدانعان شارالار تۋرالى جازباشا ەسەپ تاپسىرۋ تالابى قويىلدى.