الماتى تاۋلارىندا 5 ستۋدەنت جوعالىپ كەتكەن

الماتى قالاسىنىڭ ماڭىنداعى تاۋلى ايماقتا توتەنشە جاعدايلار مينيسترلىگىنىڭ قۇتقارۋشىلارى بەس ادامدى قۇتقاردى. قۇتقارۋ وپەراتسياسى كوك-جايلاۋ شاتقالىنىڭ اۋماعىندا, تەڭىز دەڭگەيىنەن 1740 مەتر بيىكتىكتە جۇرگىزىلدى, دەپ حابارلادى Qandastar.kz اقپاراتتىق پورتالى.

تجم مالىمەتىنشە, 20–21 جاس ارالىعىنداعى جاستار تاۋعا ارنايى دايىندىقسىز كوتەرىلگەن. شىڭدى باعىندىرۋدى كوزدەگەن ولار تومەن تۇسە الماي, كومەك سۇراۋعا ءماجبۇر بولعان.

قيىن مەتەوجاعدايلارعا قاراماستان – قاتتى جەل مەن جاڭبىردىڭ سالدارىنان كورىنۋ شەكتەۋلى بولسا دا – رەسپۋبليكالىق جەدەل-قۇتقارۋ جاساعى (رجقج) مەن قۇتقارۋ قىزمەتىنىڭ ماماندارى جەدەل ىزدەستىرۋ جۇمىستارىن ۇيىمداستىردى.

ناتيجەسىندە بارلىق ستۋدەنتتەر تابىلىپ, قاۋىپسىز جەرگە ەۆاكۋاتسيالاندى. قۇتقارۋشىلار ولاردى تاۋدان ءتۇسىرىپ, الماتى قالاسىنا جەتكىزدى.

تجم تاۋلى ايماقتارعا سەرۋەندەۋگە شىقپاس بۇرىن اۋا رايى بولجامىن تەكسەرىپ, قاجەتتى قۇرال-جابدىقتارمەن قامتاماسىز ەتىلۋدى جانە قاۋىپسىزدىك تالاپتارىن ساقتاۋدى ەسكەرتەدى.