الماتىدا 25 كۇن بۇرىن جوعالعان ءجاسوسپىرىم الاياقتىققا قاتىسى بار دەگەن كۇدىككە ىلىنگەن

فوتو: فەيسبۋك

الماتىدا 28 شىلدەدە جوعالىپ كەتكەن 16 جاستاعى ايدوس اكىمباەۆ تابىلدى. ءجاسوسپىرىمدى ىزدەۋ جۇمىستارى 25 كۇنگە سوزىلىپ, ول امان-ەسەن ۇيىنە ورالعان, دەپ جازدى qandastar.kz

بۇل تۋرالى Stan.kz اقپارات اگەنتتىگى حابارلايدى.

ايدوس 28 شىلدە كۇنى تاڭەرتەڭ مامىر-3 شاعىناۋدانىنداعى ۇيىنەن قوقىس توگۋ ءۇشىن شىعىپ, ءىز-ءتۇسسىز جوعالىپ كەتكەن. بەينەباقىلاۋ كامەرالارى ونى ساعات 10:53 شاماسىندا ۇيلەردىڭ ءبىرىنىڭ جانىندا ءتۇسىرىپ العان. الايدا قوقىس كونتەينەرلەرىنە باعىتتالعان كامەرالار ىستەن شىققان, سول سەبەپتى بالانىڭ كەتكەن ءىزى تابىلماعان.

وقيعاعا بايلانىستى پوليتسيا قىلمىستىق ءىس قوزعاپ, ىزدەۋ شارالارىنا تۋىستارى مەن ەرىكتىلەر قوسىلعان. ايدوستىڭ اناسى الەۋمەتتىك جەلىلەر ارقىلى جۇرتتان كومەك سۇراپ, ۇلىنىڭ فوتوسۋرەتتەرىن تاراتۋمەن بولعان. وسىلايشا بالا 22 تامىزدا تابىلعان.

اتالعان جاعدايعا قاتىستى Stan.kz ءتىلشىسى الماتى قالالىق پوليتسيا دەپارتامەنتىنەن ءمان-جايدى سۇراپ ءبىلدى.

پوليتسيا مالىمەتىنشە, اناسى ءىز-ءتۇسسىز جوعالىپ كەتتى دەگەن بالانىڭ الاياقتىق ارەكەتكە قاتىسى بار بولىپ شىقتى.

«تامىز ايىنىڭ باسىندا ايەل پوليتسياعا حابار-وشارسىز كەتكەنى تۋرالى ارىز بەرگەن. تەكسەرۋ بارىسىندا جوعالىپ كەتكەن ازاماتتىڭ اسا ءىرى كولەمدەگى الاياقتىق دەرەگى بويىنشا تىركەلگەن قىلمىستىق ىسكە قاتىستى كۇدىكتى ەكەندىگى بەلگىلى بولدى. ونىڭ كامەلەتكە تولماعانىن ەسكەرە وتىرىپ, وعان بۇلتارتپاۋ شاراسى رەتىندە ۇيقاماق قولدانىلعان. الايدا, ول بۇل شارانى بۇزىپ, جاسىرىنعان. كەيىن سوت سانكتسياسى وزگەرتىلىپ, قاماۋعا الۋ تۋرالى شەشىم قابىلداندى», –دەلىنگەن حابارلامادا.

ال ءجاسوسپىرىمنىڭ ۇرلانۋ دەرەگى بويىنشا تەرگەۋ ءجۇرىپ جاتىر ەكەن.

«مەديتسينالىق كۋالاندىرۋ قورىتىندىسى بويىنشا دەنە جاراقاتتارى انىقتالماعان, دەنساۋلىق جاعدايى قاناعاتتانارلىق. ۇرلاۋ دەرەگىنە قاتىستى تاراعان اقپاراتقا كەلسەك, بۇل فاكتى بويىنشا تەرگەۋ امالدارى ءجۇرىپ جاتىر. ونىڭ قورىتىندىسى بويىنشا قۇقىقتىق باعا بەرىلەدى», – دەلىنگەن حابارلامادا.

سونداي-اق پوليتسيا زاڭدا كورىنەۋ جالعان اقپارات تاراتقانى ءۇشىن جاۋاپكەرشىلىك قاراستىرىلعانىن مالىمدەدى.

ال ءجاسوسپىرىمنىڭ اناسىنىڭ ايتۋىنشا, ۇلىن بەيتانىس ادامدار ۇرلاپ اكەتىپ, بىرنەشە اپتا بويى كۇشپەن ۇستاعان.

“ ۇلىن جوعالتتىم” دەگەن ايەلدىڭ نۇسقاسى قانداي?

ايەلدىڭ ايتۋىنشا, ۇلىن قوقىس جاشىكتەرىنىڭ جانىنداعى تۇراقتا تۇرعان جەرىنەن ءۇش بەلگىسىز ەر ادام كۇشتەپ كولىككە وتىرعىزىپ الىپ كەتكەن. سوسىن كىلتى مەن اقشاسىن تارتىپ العان. بالانى شىمكەنت قالاسىنا اپارعان. اناسىنىڭ ايتۋىنشا, ول جەردە ايدوس بىرنەشە كۇن جەرتولەدە كۇشتەپ ۇستالعان جانە فيزيكالىق زورلىق كورسەتىلگەن.

بۇدان سوڭ ءجاسوسپىرىمدى تۇركىستان وبلىسىنا اپارىپتى. سول جەردە ول جانارماي قۇيۋ بەكەتىندە ىڭعايلى ءساتتى پايدالانىپ, قاشىپ شىققان. بالانىڭ ايتۋىنشا, ول جول بويىندا كولىك توقتاتىپ, تۇندە دالادا قونۋعا ءماجبۇر بولعان. وسىلايشا ول اناسىمەن قايتا قاۋىشقان. اناسىنىڭ ايتۋىنشا, ايدوس تابىلعان كەزدە ءدال ۇيدەن شىققانداعى كيىمىمەن بولعان. ۇستىندە فۋتبولكا, شورتى جانە قارا كوك اياق كيىمى بولعان. ايەل بالاسىنىڭ پسيحولوگيالىق جاعدايى اۋىر ەكەنىن ايتتى. سونداي-اق ۇلىن پوليتسيانىڭ كومەگىنسىز تاپقانىن جەتكىزدى.

دەگەنمەن ول كەيىننەن جاعدايدى باياندايتىن جازباسىن جەلىدەن ءوشىرىپ تاستادى. وقيعانىڭ تولىق ءمان-جايىن ءبىلۋ ءۇشىن وزىنە حابارلاسقان ەدىك, الايدا كەيىن بايلانىسقا شىعاتىنىن ايتتى.