الماتىدا 50 Cent-ءتىڭ كەپكاسىن قاعىپ العان جىگىت 80 ملن تەڭگەدەن باس تارتتى

فوتو: stan.kz

كەپكا ۋاقىت وتە كەلە ءوز قۇنىن ارتتىرادى, – دەيدى ول.

2023 جىلدىڭ قاراشاسىندا الماتىدا وتكەن 50 Cent-ءتىڭ The Final Lap Tour الەمدىك تۋرىنىڭ ءبىر كونتسەرتىندە بولعان ەرەكشە جاعداي مەديا مەن الەۋمەتتىك جەلىلەردە كەڭىنەن تالقىلاندى. كونتسەرت بارىسىندا رەپەر كەپكاسىن كورەرمەندەرگە لاقتىرىپ, ونى دارحان ەسىمدى جاس جىگىت قاعىپ الدى. سول كەزدە كەپكا قىزۋ تالقىلانىپ, وعان 20 ميلليون تەڭگە, كولىك جانە پاتەر ۇسىنعاندار بولعان. بۇل تۋرالى Tengri Life پورتالى حابارلادى.

دارحاننىڭ ايتۋىنشا, كەپكاعا قاتىستى تالقىلاۋلار باسەڭدەگەنمەن, ونى ساتىپ الۋعا ۇسىنىستار ءالى دە ءتۇسىپ جاتىر. ەڭ ءىرى ۇسىنىس بىلتىر بىر بيزنەسمەننەن كەلگەن. ول كەپكا ۇشىن 80 ميلليون تەڭگە ۇسىنعان.

ءبىر جىگىت ماعان TikTok ارقىلى ۇسىنىس جاسادى. ونىڭ قازاقستاننىڭ ءبىر ايماعىندا جالعا بەرەتىن ساۋدا ورتالىعى بار ەكەن. ول ەگەر مەن كەلىسسەم, ەرتەڭ ادۆوكات شاقىرىپ, عيماراتىن ساتىپ, كەپكا ۇشىن 80 ميلليون تەڭگە بەرەتىنىن ايتتى. بۇل باسكيىم تۋرالى شۋ شىعا باستاعان كەزدە بولعان. مەن باس تارتتىم, «اقىماق بولما, نە ءۇشىن كەرەك?» دەدىم. ونى بۇل ويدان باس تارتۋعا كوندىردىم. «بۇل تەك كەپكا عوي, كەرەك ەمەس» دەدىم. بىراق ول تاباندىلىق تانىتتى. مەن ويلانىپ كورەمىن دەپ ۋادە بەردىم. شامامەن جارتى جىلداي ۋاقىت وتكەن سوڭ ول ماعان قايتا جازىپ, كەپكانى سۇرادى. مەن ءالى دە 40-50 ميلليون تەڭگەگە ۇسىنىستار ءتۇسىپ جاتقانىن ايتىپ, ونىڭ 80 ميلليوندىق ۇسىنىسى الى دە كۇشىندە مە دەپ سۇرادىم. ول كەپكانى ساتىپ الۋدى جوسپارلامايتىنىن, ەندى قىزىعۋشىلىعى جوق ەكەنىن ايتتى. مەن وعان «جارايسىڭ!» دەدىم. ارينە, ول ەرەسەك بولىپ, اقىلعا كەلگەن سياقتى. ءبىز ءالى دە بايلانىستامىز, ول جاعدايىمدى سۇراپ تۇرادى, – دەدى باسكيىم يەسى.

كوپ ۇسىنىسقا قاراماستان جىگىت كەپكانى وزىندە قالدىرعان. سەبەبى ول ءۇشىن بۇل زات – ومىرىندەگى ماڭىزدى ءساتتىڭ ەستەلىگى رەتىندە ەرەكشە قۇندىلىققا يە.

كەلىسپەدىم. ويتكەنى بۇل – مەن ءۇشىن ءوز الدىنا ءبىر ەستەلىك, ومىرىمدەگى كەرەمەت ءساتتى ەسكە تۇسىرەتىن نارسە. بۇل وتە كەرەمەت دەپ ويلايمىن. اقشا تۋرالى ايتسام, كەپكا ۋاقىت وتە كەلە ءوز قۇنىن ارتتىرادى. مەن – جانكۇيەرمىن. بۇل – جاستىق شاعىمنىڭ ەستەلىگى. كەپكا مەن ءۇشىن ماڭىزدى. ونى كەز كەلگەن ۋاقىتتا ساتۋعا بولادى. سوندىقتان, ءيا, ءبىر كەزدەرى ۇلكەن ۇسىنىستار بولدى. بىراق قازىر مەن ءۇشىن بۇل – كوبىرەك ەستەلىك, سول كۇننىڭ ەسكەرتكىشى ىسپەتتەس, – دەيدى كەپكانىڭ قازىرگى يەسى دارحان.

سونداي-اق ول كەپكاعا پاتەرىندە ارنايى ورىن بولگەنىن, ونى ادەمى شىنى قوراپقا سالىپ قويعانىن ايتتى. سول ارقىلى ارقاشان سول ايتۋلى كۇندى ەسكە ءتۇسىرىپ وتىراتىنىن جەتكىزدى.

دارحان ءبىراز ۋاقىت بۇرىن 50 Cent-ءتىڭ كەپكاسىنا قولتاڭباسىن الۋ يدەياسى پايدا بولعانىن دا ايتتى. ءتىپتى, بەلگىلى قازاقستاندىق رەپەر سكريپتونيتتەن دە قولتاڭبا الۋدى ويلاعان. وسىلايشا, ەكى مۋزىكالىق اڭىزبەن بايلانىستى ەرەكشە ارتەفاكت جاساعىسى كەلگەن. الايدا ۋاقىت وتە كەلە دارحان ءبارىن سول قالپىندا قالدىرۋدى ءجون كورگەن.