جاڭالىقتار
الماتىدا ايەل اپكەسىنىڭ ءۇيىن يەمدەنۋ ءۇشىن ونى جانە بالاسىن ءولتىردى دەپ ايىپتالدى
فوتو: stan.kz
18 قازان كۇنى الماتىدا پسيحيكالىق دەنساۋلىق ورتالىعىنىڭ بۇرىنعى ءبولىم باسشىلارى, قۇقىق قورعاۋ ورگاندارىنىڭ بۇرىنعى قىزمەتكەرلەرى, نوتاريۋستار, ريەلتورلار جانە قايتا قىلمىس جاساعانداردىڭ قاتىسۋىمەن سوت وتىرىسى ءوتتى. بۇل قارالىمدا زەينەتكەر ەمما كوندراتەۆنا دولگوۆانىڭ ءۇيىن زاڭسىز يەمدەنۋ جانە ونى قاساقانا ءولتىرۋ ءىسى بويىنشا 8 ادام كۋاگەرلىك ەتتى, دەپ جازادى qandastar.kz Stan.kz-كە سىلتەمە جاساپ حابارلايدى.
«مەنىڭ ورنىما ءبارىن شەشىپ قويعان ەدى»
مارقۇم ەمما دولگوۆا اۋىرماي تۇرىپ ونىڭ ءۇيىن ا.مينسكايا مەن بۇرىنعى كۇيەۋى جالعا الىپ تۇرعان. ەرلى-زايىپتى كوشىپ كەتكەننەن كەيىن دە زەينەتكەرمەن جاقسى قارىم-قاتىناس قۇرىپ, ءتۇرلى وتباسىلىق مەرەكەلەردە توبە كورسەتىپ جۇرگەن. وتباسىنىڭ جاقىن ادامىنا اينالعان ولار دولگوۆانىڭ بىر ۋاقىتتا توسەك تارتىپ, اۋىر حالدە جاتقانىن بىلەدى. وسى ۋاقىتتا زەينەتكەردىڭ دەنساۋلىعىنا قارايتىن كومەكشى رەتىندە دولگوۆانىڭ اپكەسىنىڭ قىزى يرينا گاپپاروۆا كەلەدى. سول ساتتەن باستاپ يرينا جۇبايلاردى ايەلگە جاقىنداتپاۋعا تىراسادى.
«ەمما كوندراتەۆنا بۇعان دەيىن اقشا ايىرباستاۋ ورنىندا قىزمەت ىستەگەن. ارقاشان قوماقتى قارجى جيناپ جۇرەتىن. دەپوزيتتە 4 ميلليوننان اسا اقشام بار دەدى. اتىنداعى ەكى ءۇيدىڭ بىرەۋىن تۋعان ۇلىنا جانە قايتىس بولىپ كەتكەن ۇلىنىڭ قىزىنا مۇراگەرلىككە جازىپ بەرەمىن دەپ وتىراتىن. وكىنىشكە قاراي, سول كەزدىڭ وزىندە ۇلى ەۆگەني كالينين قاتتى ماستىققا سالىنىپ كەتكەن ەدى. ال ول كەزدە نەمەرە قىزى ءالى كامەلەت جاسقا تولمادى. ءبىر كۇنى ەمما كوندراتەۆنانىڭ اقشاسى جوعالىپ كەتتى. ول دارەتحاناعا كىرىپ كەتكەن كەزدە 100 مىڭ تەڭگە بولعان. شىققان كەزدە 80 مىڭ تەڭگە عانا قالىپ, 20 مىڭ تەڭگە جەتپەي تۇرعان. سول كەزدە گاپپاروۆا بۇل اقشانى ەۆگەني كالينين ۇرلادى دەپ ايتقان. الايدا ەۆگەني ماس كۇيدە جۇرسە دە, ەشقاشان ءبىر تيىن دا الماعان. ول اقشانى ۇرلاماعان», – دەدى كۋاگەر مينسكايا.
مينسكاياعا دولگوۆا قاتتى اۋىرىپ تۇرعانىن ايتىپ حابارلاسقان. ولاردىڭ ۇيگە شۇعىل تۇردە جەتۋىن وتىنگەن. اۋىرىپ تۇرعانىنا قاراماستان وتباسىلىق دوسىنا ءبىر دەرەكتى ايتىپ ۇلگەرگەن.
«ول ماعان قازىر دەنساۋلىعىنىڭ ناشارلاپ كەتكەنىن ايتتى. سول كەزدە مەن ودان ء«سىز مۇراگەرلىككە قاتىستى وسيەت جازدىڭىز با? دەپ سۇرادىم. ول ماعان «قازىر ەشنارسە قولىمنان كەلمەيدى. ءبارىن مەنىڭ ورنىما شەشىم قويدى» دەپ جاۋاپ بەردى. مۇنى مەنىڭ بۇرىنعى كۇيەۋىم دە ەستىگەن, كۋاگەر بولعان. سول كەزدە زەينەتكەردىڭ جانىندا گاپپاروۆا بولاتىن. ول سول ايەلدىڭ اتىن اقىرىن اتادى. ونىڭ جاعدايى كۇننەن-كۇنگە ناشارلاي بەردى. ءوت جولى اۋرۋى اسقىنا ءتۇستى. سوڭعى كۇندەرى وعان بارعانىمدا ول تەك سول جاعىندا جاتاتىن, استىنا جايما توسەلىپ, قاسىندا ءبىر شەلەك تۇراتىن. ونىڭ وت جولى اۋىرىپ, قۇسا بەرەتىن. ونى سوڭعى رەت كورگەنىمدە تىپتى سويلەي دە المايتىن», – دەدى وتباسىلىق دوسى مينسكايا.
فوتو: Stan.kz / كۋاگەر مينسكايا جانە سەرگەەۆ
مينسكايانىڭ ايتۋىنشا, سول كۇنى جۇبايى ەكەۋى جەدەل-جاردەم قىزمەتىن شاقىرعان. بىراق گاپپاروۆا قارسى شىعىپ, ولاردى قانداي دا ءبىر اقىلى ەمحاناعا اپارعان. سول جەردەگىلەر ەگدە تارتقان ايەلدى اۋرۋحاناعا جاتقىزۋدىڭ قاجەتى جوق, تەك امبۋلاتوريالىق ەم جەتكىلىكتى دەپ ايتتى.
مينسكايانىڭ كۇيەۋى سەرگەەۆ تە سوت وتىرىسىندا كۋاگەر بولدى. سوت تالقىلاۋىندا ەكەۋىنىڭ ءسوزى دە ءبىر جەردەن شىقتى. ەر ادامنىڭ ايتۋىنشا, دولگوۆانى جەرلەگەن كەزدە ايەلدىڭ موينىنا جانە باسىنا اق ماتانى تۇيىنشەك سەكىلدى وراپ قويعانىن بايقاعان.
«ەمما دولگوۆا ەكىنشى رەت قاتتى اۋىرعان كەزدە ءبىزدى گاپپاروۆا ۇيگە كىرگىزبەي, قۋىپ شىقتى. سول كەزدە ونى اۋرۋحاناعا جاتقىزعىمىز كەلدى. الايدا ول قارسى شىعىپ, ءبىزدىڭ زەينەتكەرگە ەش تۋىستىق جاقىندىعىمىز جوق ەكەنىن العا تارتتى. بۇدان كەيىن ول وتباسىمەن ارالاسپاي كەتتىك. بىراق جەرلەۋ راسىمىنە ءبىزدى شاقىردى. سول ۋاقىتتا قاريانىڭ ءوز ولىمىمەن ولمەگەنىن سەزگەندەي بولدىق», – دەدى كۋاگەر سەرگەەۆ.
«گاپپاروۆا اپكەسىنىڭ ولىمىنەن كەيىن ءۇيدى بىردەن ساتىلىمعا قويعان»
ءىس قاراۋىندا دولگوۆا كوز جۇمباي تۇرىپ, ءۇيدى يرينا گاپپاروۆاعا راسىمدەپ بەرگەنى تۋرالى ايتىلدى. ءولىمنىڭ ارتىن سۋىتپاي گاپپاروۆا بىرنەشە ايدا قوس پاتەردى ساتىلىمعا قويعان. پاتەرلەر قازىبەك بي جانە سۇلەيمەنوۆ كوشەلەرىندە ورنالاسقان. قازىبەك بي كوشەسىندەگى ءۇي ساتىلعانشا, گاپپاروۆا تۋىسقان سىڭلىسىنە ۇيدەگى مىسىقتاردى قاراي تۇر دەپ وتىنىش تاستاعان. بۇگىنگى سوتتا سول گاپپاروۆانىڭ اپكەسىنىڭ قىزى جانە ءنۇسىپوۆانىڭ قىزى كۋاگەرلىك ەتتى. ەكەۋى دە ۇيدە ۋاقىتشا تۇرعانىن ايتادى.
ء«يا, ماعان سوندا تۇر دەپ ءوتىنىش بىلدىرگەن. بۇل ۇسىنىس تىكەلەي يرينا گاپپاروۆادان ەمەس, انام ارقىلى كەلگەن. وندا يت تە, مىسىق تا بولدى. يت پەن زاتتارعا قاراپ تۇردىم. باسىندا بارىپ-كەلىپ ءجۇردىم, كەيىن سول جەردە تۇردىم», – دەدى نەمەرە ءسىڭلىسى.
فوتو: Stan.kz / گاپپاروۆانىڭ تۋعان اپكەسىنىڭ قىزى جانە نەمەرە قىزى
سونىمەن قاتار وتىرىس بارىسىندا نەمەرە ءسىڭلىسى گاپپاروۆا ونى قالاداعى «مەديتسينالىق-پسيحولوگيالىق ماسەلەلەر ورتالىعى» مامانداندىرىلعان اۋرۋحاناسىندا بوس ورىن بار ەكەنىن ايتىپ, قىزمەتكە ورنالاسۋ ءۇشىن سۇحباتتان وتۋگە شاقىرعان. الايدا نەمەرە ءسىڭلىسى «فەلدشەر» ماماندىعى بويىنشا ورتا ءبىلىمى بولعاندىقتان باس دارىگەر ونى جۇمىسقا قابىلداماعان كورىنەدى.
بۇدان كەيىن گاپپاروۆانىڭ سىڭلىلەرى قازىبەك بي كوشەسىندەگى ءۇيدى الدەكىمدەر ساتىپ العانىن بىلەدى. سەبەبى ءۇيدىڭ جاڭا يەسى پاتەرگە كەلىپ, ۇيدە باسقا بىرەۋلەر تۇرىپ جاتقانىنا تاڭدانادى. ولار باراتىن جەرى جوق ەكەنىن ايتىپ, ايىنا 93 مىڭ تەڭگە تولەپ تۇرۋدى وتىنەدى. ءبىراز ۋاقىت وتكەن سوڭ ولار ءۇيدى بوساتادى. سوتتا وسى ءۇيدىڭ قازىرگى يەسى بەكتەنوۆ تە ءسوز سويلەدى.
ونىڭ ايتۋىنشا, اۋەل باستا, گاپپاروۆامەن ونى ورتاق دوسى تانىستىرعان. كەيىن گاپپاروۆا بەكتەنوۆتەن 8 ميلليون تەڭگە قارىز سۇراپ, قازىبەك بي كوشەسىندەگى ءۇيدى كەپىلگە قويعان. كەپىلحاتتى سۇلتانبەكوۆ ەسىمدى نوتاريۋس زاڭداستىرىپ بەرگەن. ارادا 6 اي ۋاقىت وتكەن سوڭ گاپپاروۆا بەكتەنوۆكە قارىزدى قايتارادى. بۇدان بىرنەشە اپتا وتكەن سوڭ گاپپاروۆا وعان ۇيدى ساتىپ الۋ تۋرالى ۇسىنىس تاستايدى. ەشنارسە جوعالتپايتىنىن بىلگەن كاسىپكەر بەكتەنوۆ ءۇيدى 15 ميلليونعا ساتىپ الادى.
فوتو: Stan.kz / ءۇيدى الدانىپ, ساتىپ العاندار كۋاگەرلىك ەتتى
ال سۇلەيمەنوۆ كوشەسىندەگى ەكىنشى ءۇي 18 ميلليون 500 مىڭعا ساتىلادى. قازىر وسى ءۇيدىڭ يەسى بۇل ءۇيدى الۋ ءۇشىن نەسيەگە بەلشەسىنەن باتقانىن, سوندىقتان ءوزىن جابىرلەنۋشىلەردىڭ ءبىرى رەتىندە قوسۋىن تالاپ ەتتى.
سۋديا بولاتوۆ پروتسەسكە جەرلەۋ اگەنتتىگىنىڭ ديرەكتورىن كۋاگەرلىك ەتۋگە شاقىردى.
“گاپپاروۆا جەكە سوت-مەديتسينالىق ساراپشىسىن شاقىرعان”
ناتاليا ەسىمدى ديرەكتور, جەرلەۋ كەزىندە ەشقانداي قاستاندىق ىزدەرىن بايقاماعانىن ەسكەرتتى. سەبەبى ول قانداي دا ءبىر ولقىلىقتى بايقاپ, سەزىكتەنگەن جاعدايدا پوليتسيانى شاقىرۋعا مۇددەلى ەكەنىن اتاپ ءوتتى. بىراق وتىرىس بارىسىندا ول گاپپاروۆانىڭ وتىنىشىمەن, ءولىمدى تىركەۋ ءۇشىن اۋرۋحانا قىزمەتكەرلەرىن شاقىرۋدىڭ ورنىنا, جەكە سوت مەديتسينالىق ەكسپەرتىنە حابارلاسقانىن ايتىپ قالدى. ال ساراپشى كولەسنيكوۆ گاپپاروۆانىڭ تانىسى بولىپ شىعادى.
سۋديا بولاتوۆ وسى كەزدە جەرلەۋ قىزمەتىنىڭ باسشىسىنا سۇراق قويدى.
ء«سىز اگەنت رەتىندە جاقسى بىلەسىز. ادامدى جەرلەۋ كەزىندە ونىڭ ولىمىنە بايلانىستى مەديتسينالىق قورىتىندىنىڭ بار ەكەنىنە كوز جەتكىزۋ كەرەك, سولاي ما? ساراپشىدان ءولىمنىڭ سەبەبى تۋرالى قورىتىندى الىنۋى قاجەت. دەمەك سىز گاپپاروۆانىڭ ءوتىنىشى بويىنشا كەلدىڭىز, مەنىڭ مىناداي سۇراعىم بار: نەگە ءسىز, بۇل ءسىزدىڭ مىندەتىڭىزگە كىرمەسە دە, سوت-مەديتسينالىق ساراپشىنى شاقىردىڭىز?» – دەدى سۋديا.
جاقسى. سىزگە گاپپاروۆا پوليكلينيكامەن قيىندىقتار بولۋى مۇمكىن ەكەنىن ايتتى, سولاي ما?
– ءيا.
– بۇل ءسىزدى الاڭداتپادى ما?
– جوق.
– نەگە?
«سەبەبى قازىرگى كەزدە بۇل 50 دە 50 جاعداي. ادامدار ءوز تۋىستارىنا… ول ءبىرىنشى ەمەس, سوڭعى دا ەمەس. بۇگىندە مەنىڭ ادامدارىمنىڭ جارتىسى سوت-مەديتسينالىق ساراپشىلاردى ۇيگە شاقىرۋدى وتىنەدى. سەبەبى ەمحانامەن ماسەلە بولىپ كەتەدى. اۋرۋحانالار بىزگە قازىر انىقتاما بەرگىسى كەلمەيدى, نە باسقا ءبىر سەبەپتەرمەن بەرمەيدى. سول عانا. بۇل سيرەك جاعداي ەمەس, كولەسنيكوۆ باسقالارعا دا ءجيى بارادى», – دەپ جاۋاپ بەردى جەرلەۋ قىزمەتىنىڭ ديرەكتورى ناتاليا.
فوتو: Stan.kz / جەرلەۋ اگەنتتىگىنىڭ ديرەكتورى
جابىرلەنۋشىنىڭ نەمەرەسى ەلەونورادان ءىستىڭ ءمان-جايىن سۇراپ كوردىك. ونىڭ ايتۋىنشا, گاپپاروۆا ونى جاقتىرماعان. تۋىسقاندارىنا ونىڭ ارتىنان جالا جاپقانىن ايتادى. دولگوۆانىڭ نەمەرە قىزى اجەسى كوز جۇمار الدىندا گاپپاروۆانىڭ 7 جىل بويى جوق بولىپ كەتكەنىن ەسكە الدى.
“ول اكەمنىڭ اعاسى ەۆگەنيدى دە ءولتىرىپ كەتتى”
«اجەم بۇعان دەيىن مۇلدەم اۋىرماعان ەدى. گاپپاروۆا وقيعادان بۇرىن عانا, 7 جىلدان كەيىن پايدا بولا قالدى. سودان كەيىن اجەم كۇرت اۋىرىپ قالدى. سول كەزدە اجەمىز ەشنارسە ايتا المادى. اجەمدى ەمدەتەيىن دەپ بارعان كەزدە ۇيدە بولعان تاتيانا مەن گاپپاروۆا مەنى كىرگىزبەي قويدى. الىپ كەتۋىمە كەدەرگى كەلتىردى. اجەمدى ولتىرگەندەردىڭ قاتاڭ جازالانعانىن قالايمىن. ادىلدىك سالتانات قۇرسىن دەپ تىلەيمىن. سەبەبى ول اكەمنىڭ اعاسى ەۆگەنيدى دە ءولتىرىپ كەتتى», – دەدى جابىرلەنۋشى.
ال جابىرلەنۋشى تاراپتىڭ ادۆوكاتى وكسانا بۋرياكتىڭ باستاپقىدا تۇسىرگەن ارىزىن پوليتسيا قابىلداماي قويعان. كەيىن كۇدىكتىلەر ونىڭ باسقا دا الاياقتىق ىسكە قاتىسى بولعاندىقتان تەرگەۋ بارىسىنا قوسىپتى.
«ەلەونورا اجەسى كوز جۇمعاندا ەندى كامەلەتكە تولعان ەدى. سول كەزدە ول ماعان كومەككە جۇگىندى. اجەسىنىڭ دەنەسىن ۇيدەن شىعارىپ جاتقان كەزدە ونى سول جەردەن شىعارىپ جىبەردى. «سەن مۇندا ەشكىم ەمەسسىڭ» دەپ ايتتى. وسى جاعدايعا بايلانىستى ءبىز وعان كومەكتەسەمىز دەپ شەشىم قابىلدادىق. ويتكەنى ول قۇقىقتىق قورعانىسقا مۇقتاج بولدى», – دەدى ادۆوكات وكسانا بۋرياك.
پوليتسيا گاپپاروۆا دەگەن ايىپتالۋشىنى تاۋىپ, وعان قاجەت قۇجاتتاردى, اتاپ ايتقاندا, مۇراگەرلىك ىستەردى جۇرگىزۋ ءۇشىن وسيەت جانە سەنىمحات ۇسىندى.
ء«بىزدى الاڭداتقان جايت وسيەت 2020 جىلدىڭ 9 قىركۇيەگىندە راسىمدەلگەن. ال ول كەزدە دولگوۆا ءوز قولىمەن قول قويا المايتىن ەدى. وندا گاپپاروۆا قول قويۋشى مەن كۋاگەر رەتىندە ايىپتالۋشىلاردىڭ ءبىرى بولدى. كەلەسى كۇنى, قانداي ەكەنى بەلگىسىز اجەسى مۇراگەرلىك ىستەردى جۇرگىزۋ ءۇشىن سەنىمحاتتى گاپپاروۆاعا جازىپ بەرگەنى تۋرالى ايتىلدى. يرينا گاپپاروۆانىڭ بارلىق ەپيزودقا قاتىسى بار. ايىپتاۋ اكتىسىنە سايكەس, ول نەگىزىنەن ۇيىمداسقان قىلمىستىق توپتىڭ (وپگ) ۇيىمداستىرۋشىسى رەتىندە كۇدىككە ءىلىندى. ساراپتاما ناتيجەسىندە مارقۇمنىڭ دەنەسىنە ەكسگۋماتسيا جاسالىپ, قىلعىندىرىپ ولتىرىلگەنى تۋرالى انىقتالدى», – دەدى جابىرلەنۋشىنىڭ ادۆوكاتى.
مەملەكەتتىك ايىپتاۋشىنىڭ ايتۋىنشا, ءىس قىلمىستىق كودەكستەگى 12 باپ بويىنشا, 37 ەپيزودتىق ءىس قارالىپ جاتىر.
ەسكە سالايىق, بۇعان دەيىن ۇيىمداسقان قىلمىستىق توپ وزدەرىنىڭ «قولدان جاسالعان» نوتاريۋستارىن پايدالانا وتىرىپ, دۇنيە-مۇلكىن الدەكىمدەردىڭ اتىنا تىركەگەنىن جازدىق. وسىلايشا ولاردىڭ ءىزىن جاسىرىپ, قىلمىستىق ارەكەتتەرىن زاڭداستىرعان. بۇل ولارعا قۇقىق قورعاۋ ورگاندارىنىڭ كۇدىگىن تۋدىرماي, جىلجىمايتىن م ۇلىكتى باقىلاۋعا الىپ, بيلىك ەتۋگە مۇمكىندىك بەرىپ وتىردى. قىلمىستىق توپقا 22 ادام كىرگەن: دارىگەرلەر, نوتاريۋستار جانە بۇرىن سوتتى بولعاندار. دارىگەرلەر ۇرلىقتى جۇزەگە اسىرۋ ءۇشىن كاسىبي ءبىلىمى مەن پاتسيەنتتەردىڭ قولجەتىمدى بولىپ تۇرعانىن پايدالانعان. ال نوتاريۋستار زاڭدى قورعاۋدى قامتاماسىز ەتكەن. ءسويتىپ بۇرىن قىلمىس جاساعاندار ماجبۇرلەۋشى رەتىندە ارەكەت ەتىپ, جابىرلەنۋشىلەردى فيزيكالىق تۇردە ۇستاپ, قاجەتسىز كۋاگەرلەردىڭ كوزىن قۇرتىپ وتىرعان. توپتىڭ قىلمىستىق ارەكەتتەرى تەك م ۇلىكتى ۇرلاۋمەن شەكتەلگەن جوق. قىلمىستىق ارەكەتتەرى بارىسىندا ولار راستالعان ەكى كىسى ءولتىرۋ قىلمىسىن جاسادى. بۇل كىسى ولتىرۋلەر ىزدەردى جاسىرۋعا جانە ىقتيمال كۋاگەرلەردى قورقىتۋعا باعىتتالعان.
