جاڭالىقتار
الماتىدا اقش كونسۋلدىعى سالىنباق
فوتو:اكيمات الماتى
ءماجىلىس دەپۋتاتتارى الماتى قالاسىندا اقش كونسۋلدىق مەكەمەسىنىڭ عيماراتىن سالۋ ءۇشىن اقش ۇكىمەتىنە جەر تەلىمىن جالعا بەرۋ تۋرالى قازاقستان-امەريكا ۇكىمەتارالىق كەلىسىمىن راتيفيكاتسيالادى. قۇجاتقا 2024 جىلدىڭ 27 قىركۇيەگىندە نيۋ-يورك قالاسىندا قول قويىلعان, دەپ جازدى qandastar.kz
شارتتىڭ ەرەجەلەرى جەر ۋچاسكەسىن بەرۋ ءتارتىبى مەن شارتتارىن انىقتايدى. ونىڭ اۋدانى – 70593 شارشى مەتر, جالداۋ مەرزىمى – 49 جىل. جالداۋ اقىسى 25,3 ميلليون اقش دوللارىن قۇرايدى جانە كەلىسىم ەنگىزىلگەن كۇننەن باستاپ كۇنتىزبەلىك 30 (وتىز) كۇن ىشىندە بىرىڭعاي تولەممەن تولەنەتىن بولادى.
كەلىسىمگە سايكەس اقش ۇكىمەتى جالداۋ اقىسىن قوسپاعاندا, جەر ۋچاسكەسى مەن كونسۋلدىق عيماراتىنا سالىقتار مەن باسقا تولەمدەردى تولەۋدەن بوساتىلادى. بۇل رەتتە ول كونسۋلدىق عيماراتىنىڭ قۇرىلىسىنا بايلانىستى كوممۋنالدىق قىزمەتتەردى قازاقستاندا قولدانىستاعى نورماتيۆتەر مەن تاريفتەرگە سايكەس تولەي وتىرىپ, عيماراتتى كۇتىپ-ۇستاۋعا جانە جوندەۋگە جۇمسالعان شىعىستاردى دەربەس تولەۋگە مىندەتتەلەدى.
عيماراتتى سالۋ جانە جابدىقتاۋ ءۇشىن اقش-تا وندىرىلگەن ماتەريالداردى, جابدىقتار مەن تاۋارلاردى پايدالانا الاتىن اقش مەردىگەرى باس مەردىگەر بولادى. ولار كەدەندىك تولەمدەردەن, يمپورت سالىقتارىنان جانە رۇقسات الۋ تالاپتارىنان بوساتىلادى.
