الماتىدا اۆتوبۋسقا تاپانشامەن كىرگەن ەر ادام جۇرتتى شوشىتتى

فوتو: اشىق دەرەككوز

الەۋمەتتىك جەلىدە الماتىدا اۆتوبۋستاردىڭ بىرىندە قارت ادامنىڭ قولىندا تاپانشاعا ۇقساس زاتتى ۇستاپ تۇرعانى كورىنەتىن ۆيدەو تارادى, – دەپ حابارلايدى Qandastar.kz Massaget.kz تىلشىسىنە سىلتەمە جاساپ.

ۆيدەودا ەر ادامنىڭ مىلتىقتى ءبىر قولىنان ەكىنشى قولىنا اۋىستىرىپ جاتقانىن كورۋگە بولادى, سودان كەيىن ول شىعۋعا قاراي بەت الادى. ۆيدەو اۆتورىنىڭ مالىمەتىنشە, وقيعا №106 مارشرۋت بويىنشا جۇرەتىن اۆتوبۋستا بولعان.

جەلى قولدانۋشىلارىنىڭ پىكىرى ەكىگە ءبولىندى: كەيبىرەۋلەر مۇنى ءازىل رەتىندە قابىلدادى, ال باسقالارى قاۋىپتىلىك بارىنا الاڭداۋشىلىق ءبىلدىردى.

الماتى پوليتسيا دەپارتامەنتى ەر ادامنىڭ ۇستالعانىن حابارلادى.

«الەۋمەتتىك جەلىلەردى مونيتورينگتەۋ بارىسىندا قوعامدىق كولىككە تاپانشا ۇستاعان ەر ادامنىڭ مىنگەنى انىقتالدى. جەدەل ارەكەت ەتۋ بارىسىندا قاتىسۋشىنىڭ جەكە باسى انىقتالدى. ول ۇستالىپ, پوليتسياعا جەتكىزىلدى. ەر ادام كۇزەتشى بولىپ جۇمىس ىستەيتىنىن, تاپانشانىڭ ويىنشىق ەكەنىن, ونى قالا بازارلارىنىڭ بىرىنەن ساتىپ العانىن ءتۇسىندىردى», – دەپ اتاپ ءوتتى پوليتسيا دەپارتامەنتىنىڭ ءباسپاسوز قىزمەتى.

سونداي-اق ۆەدومستۆو تالقىلاۋ جالعاسىپ جاتقانىن جانە قاتىسۋشىنىڭ ءىس-ارەكەتىنە قۇقىقتىق باعا بەرىلەتىنىن العا تارتتى.