جاڭالىقتار
الماتىدا ەكى ايدان اسا ىزدەۋدە بولعان قىزدىڭ ءمايىتى تابىلدى
فوتو: ۆيدەودان سكرين
الماتىدا ەكى ايدان اسا ىزدەۋدە بولعان بويجەتكەننىڭ ءمايىتى تابىلدى, دەپ حابارلايدى qandastar.kz
پوليتسەيلەردىڭ مالىمەتىنشە, ونى جاقىن ارالاسقان 19 جاستاعى جىگىت قىلقىندىرىپ ءولتىرىپ, دەنەسىن ايدالاعا تاستاپ كەتكەن.
كتك ارناسى جازعانداي, تەرگەۋ بارىسىندا كۇدىكتى ءوز كىناسىن تولىق مويىنداپ, مارقۇمدى بۇرىن نەسيە الۋعا ماجبۇرلەگەنىن دە ايتقان. ونىڭ سوزىنشە, ايشا نەسيە اقشاسىن قايتارمايتىنىن ايتىپ, اتا-اناسى مەن پوليتسياعا شاعىمداناتىنىن جەتكىزگەن. سول ساتتە كۇدىكتى ونى پاتەردە ولتىرگەن.
مارقۇمنىڭ قازاسى قىربالتاباي اۋىلىنىڭ جۇرتشىلىعىن ءدۇر سىلكىندىردى. تاڭ اتىسىمەن اۋىل تۇرعىندارى ايشانى اقتىق ساپارعا شىعارىپ سالۋعا جينالدى.
مارقۇمنىڭ اپكەسى ءاسيا ءحاميتتىڭ ايتۋىنشا, كۇدىكتى جىگىت ونى الدىمەن تۇنشىقتىرىپ ءولتىرىپ, كەيىن دەنەسىن پوليەتيلەنگە وراپ, سومكەگە سالعان. سودان سوڭ ءمايىتتى كەڭساي زيراتى ماڭىنداعى ساياجايلاردىڭ بىرىنە اپارىپ, قارعا كومىپ تاستاعان.
ايشا كۇدىكتىمەن جازدا TikTok جەلىسى ارقىلى تانىسقان. ول سىرقات اپكەسىن ەمشىگە كورسەتپەك بولىپ, الەۋمەتتىك جەلىدە ىزدەۋ جۇرگىزگەن. سول كەزدە الاياققا تاپ بولىپ, ونىڭ كومەكشىسى رەتىندە جۇرگەن كۇدىكتى جىگىتپەن سويلەسە باستاعان.
مارقۇمنىڭ ناعاشىسى تابيعات الىبەكتىڭ ايتۋىنشا, 60 كەلىدەي بولاتىن ءمايىتتى جالعىز ءوزى تاسىمالداۋ كۇدىكتىنىڭ قولىنان كەلمەيتىنىن ەسكەرسەك, بۇل ىسكە باسقا دا ادامداردىڭ قاتىسى بولۋى مۇمكىن دەگەن كۇدىك بار.
ايشا اۋداندىق مەكتەپتە قازاق ءتىلى مەن ادەبيەتى ءپانىنىڭ مۇعالىمى بولىپ جۇمىس ىستەگەن. جانۇياسىنىڭ نەگىزگى اسىراۋشىسى دا ءوزى بولعان.
«بۇرىن-سوڭدى ەشتەڭەگە تىركەلمەگەن, جامان ءجۇرىسى جوق. بەتىندە ۇياتى بار, اۋزىندا يمانى بار مىقتى قىز ەدى», – دەيدى مارقۇمنىڭ جەڭگەسى م ۇلىك فاتيگۇلقىزى.
قازىر 19 جاستاعى كۇدىكتى قاماۋعا الىندى. الماتى قالالىق پوليتسيا دەپارتامەنتىنىڭ رەسمي وكىلى سالتانات ازىربەكتىڭ ايتۋىنشا, قىلمىستىق ءىس «ادام ءولتىرۋ» بابى بويىنشا تەرگەلىپ جاتىر.
مارقۇمنىڭ دەنەسىندە زورلىق بەلگىلەرىنىڭ بار-جوعى سوت-مەديتسينالىق ساراپتاما ناتيجەسىندە انىقتالماق. ال قارا جامىلعان وتباسى قىلمىسقا قاتىسى بار وزگە دە ادامداردىڭ تابىلىپ, لايىقتى جازاسىن الۋىن تالاپ ەتۋدە.
