الماتىدا ەر ادام ايەلىن 10 رەت پىشاقتاپ ولتىرگەن

فوتو: اشىق دەرەككوز

الماتىدا ەر ادام ايەلىنە 10 رەت پىشاق جاراقاتىن سالىپ ءولتىردى دەپ ايىپتالىپ جاتىر. جابىرلەنۋشىنىڭ جاقىندارىنىڭ سوزىنشە, ايىپتالۋشى تاراپ قىلمىس اففەكت جاعدايىندا بولدى دەپ ايتقان. ولار كىنالى تاراپتىڭ ءادىل جازالانۋىن تالاپ ەتەدى,  – دەپ حابارلايدى Aikyn.kz Stan.kz-كە سىلتەمە جاساپ.

31 قاڭتاردا 43 جاستاعى ءال-بەينە زاريپوۆانىڭ ءمايىتى ءۇيدىڭ جەرتولەسىنەن تابىلدى. ءىس-ماتەريالدارى بويىنشا ونىڭ 15 جىل نەكەدە بولعان كۇيەۋى سابىرجان زاريپوۆ وعان 10 رەت پىشاق جاراقاتىن سالىپ ءولتىرىپ, ارتىنشا تەلەفونىنان ءوز شوتىنا 4 ميلليون 700 مىڭ تەڭگەنى اۋدارىپ العان. سودان سوڭ بارلىق قۇجاتتى الىپ, 12 جاستاعى قىزىن ءوز اپكەسىنىڭ ۇيىنە اپارىپ تاستاعان.

جابىرلەنۋشىنىڭ اناسى ماعجان ءبايسيىتوۆانىڭ سوزىنشە, مارقۇم 2010 جىلدان بەرى كۇيەۋىنەن تۇرمىستىق زورلىق-زومبىلىق كورگەن. ۇنەمى قىزعانۋ مەن باقىلاۋدان شارشاعان ءال-بەينە 2023 جىلدىڭ كۇزىندە اجىراسۋعا بەل بۋادى. سول جىلدىڭ جەلتوقسانىندا تاعى دا سوققىعا جىعىلعان كەلىنشەك پوليتسياعا جۇگىنىپ, وعان ءبىر ايعا قورعانۋ نۇسقاماسى بەرىلدى. ايەل اجىراسقاننان كەيىن قىزىمەن استاناعا كوشپەك بولعان.

“العاشىندا ايىپتالۋشى اجىراسۋعا كەلىسىمىن بەرىپ, قىزىمەن 1 اي بىرگە تۇرۋدى وتىنگەن. بىراق ءال-بەينە 31 قاڭتاردا دۋبايدان الماتىعا قىزىن الىپ كەتۋگە بارعاندا, سابىرجان وعان قىزدى كورسەتپەيدى. كەيىن “كوزىمە ءشوپ سالدىڭ” دەپ جانجال شىعارىپ, بىرنەشە ساعات سۇراقتىڭ استىنا العان. ءوز جاۋابىندا ول قىلمىسقا دەيىن ءال-بەينەمەن جىنىستىق قاتىناسقا تۇسكەنىن ايتادى. بىراق بۇعان سەنبەيمىن. سەبەبى قىزىم ودان قالاي جيىركەنەتىنىن, ءتىپتى ماڭىنا جولاعىسى كەلمەيتىنىن ايتقان. دەمەك ول ونى زورلاپ, قورلاعان”, – دەدى ءال-بەينەنىڭ اناسى.

مارقۇمنىڭ اعاسى ەرىك ءجۇسىپوۆ ءال-بەينەنىڭ ءمايىتى ادام كورگىسىز بولعانىن جانە قىلمىس بولعان جەر قانعا تولى بولعانىن ايتتى.

“ول قارىنداسىمىزدى ازاپتاعانى ايدان انىق. سەبەبى ءبىرىنشى بەتىن بۇلدىرگەن, ءتۇرى ادام كورگىسىز بولىپ كەتكەن. ءتىرى كەزىندە ءينتيمدى جەرلەرىن, ياعني جامباسىن, ءتوسىن پىشاقتاپ, قيناعان. ارتىنشا تاعى دا 4 رەت ەت تۋرايتىن پىشاقپەن پىشاقتاعان, ونىڭ جۇرەگى, وكپەسى جاراقاتتالعان, سوڭىندا موينىنا پىشاق سۇعىپ كەتكەن. بار كۇشىمەن سالىنعان پىشاق دەنەسىنەن الىنباي قالعان”, – دەدى اعاسى.

العاشىندا سوت-مەديتسينالىق ساراپتاما قىلمىس “اففەكت” جاعدايىندا بولدى دەگەن. بىراق جابىرلەنۋشى تاراپ بۇعان كەلىسپەي, تاعى دا ساراپتاما تاعايىنداعان. بۇل كەزدە “اففەكت” جوققا شىعارىلىپ, كۇدىكتىنىڭ قىلمىستى سانالى تۇردە, دايىندالىپ جاساعانى انىقتالعان.

قازىر ولاردىڭ 12 جاستاعى قىزى سابىرجان زاريپوۆتىڭ اپكەسىنىڭ قولىندا ەكەن. ويتكەنى قىلمىس بولعان سوڭ, سابىرجان دەرەۋ قولحات جاساتىپ, قىزىن سول ۇيگە اپارىپ تاستاعان. 29 ناۋرىزدا مەدەۋ اۋداندىق اكىمدىك جانىنداعى بالالاردىڭ قۇقىعىن قورعاۋ كوميسسياسى سول اپكەسىنىڭ ۇيىندە قالدىرۋدى ءجون دەپ تانىعان. سەبەبى قىز الماتىدا قالعىسى كەلەتىنىن ايتقان. ال ءال-بەينەنىڭ جاقىندارى پەتروپاۆلدا تۇرادى ەكەن.

“ايىپتالۋشىنىڭ جاقىندارى بىزدەن كەشىرىم سۇراپ, كوڭىل ايتپادى. ءتىپتى نەمەرەمدى كورۋگە كەلگەن كەزدە جاقتىرماي, بىزگە تاپ بەرۋگە دايىن تۇردى. ولاردىڭ ءىنىسى ءبىزدىڭ قىزدى ەمەس, كەرىسىنشە ءبىز ولاردى ىنىسىنەن ايىرعاندايمىز. نەمەرەمىزدى قازىر باقىلاۋدا ۇستاپ, ارالاستىرمايدى. ودان قالسا ءال-بەينەنى كىنالاپ,  ءوزى قىزعاندىردى دەپ وتىر”, – دەدى مارقۇمنىڭ اناسى.

جابىرلەنۋشى تاراپتىڭ سوزىنشە, ءال-بەينە بۋحگالتەر بولىپ جۇمىس ىستەپ, وتباسىن اسىراعان. 42 جاسىندا ءۇش پاتەر جانە ءبىر جەر ءۇي, كولىك ساتىپ العان. ال سابىرجان ۇيدە وتىرعان. ءارى كۇيەۋىنە جەكە كاسىپكەرلىك اشىپ بەرۋگە كومەكتەسكەن. سوزدەرىنشە, ەشقاشان بەتىنە باسىپ, اسىراۋشى بولعانىنا مىندەتسىنبەگەن.

قازىر سابىرجان زاريپوۆ تەرگەۋ يزولياتورىندا. قىلمىستىق كودەكستىڭ 99-بابى “ادام ءولتىرۋ” جانە 175-بابى “ۇرلىق” بويىنشا ءىس قوزعالدى. الايدا جابىرلەنۋشى تاراپ “اسا قاتىگەزدىكپەن جاسالعان ءولىم” دەپ ءىستى اۋىستىرعىسى كەلەدى.

ءباسپاسوز كونفەرەنتسياسىنا ايتبەك امانگەلدى دە كەلىپ, جابىرلەنۋشى تاراپقا قولداۋ كورسەتتى.

ء“ال-بەينەنىڭ وتباسى ەندى ونى ەشقاشان كورمەيدى, ونى قۇشاقتاي المايدى, سۇيە المايدى. ەشقاشان ەندى ولار تىلدەسە المايدى, بۇل قايعىنى ەشكىم سەيىلتە المايدى, مۇنىڭ قانشالىقتى اۋىر ەكەنىن تۇسىنەمىن. ال قىلمىسكەر ءومىر ءسۇرۋىن جالعاستىرادى. “اففەكت” دەپ تانىلسا, ول وسىنداي سۇمدىق ارەكەتى ءۇشىن 3-اق جىل تۇرمەدە وتىرىپ شىعادى. ءبىز حالىق بولىپ مۇنىمەن كۇرەسۋىمىز كەرەك, سەبەبى كەلەسى قۇربان كىم ەكەنىن ءبىز بىلە المايمىز”, – دەدى سالتانات نۇكەنوۆانىڭ اعاسى, قۇقىق قورعاۋشى ايتبەك امانگەلدى.