الماتىدا فەلدشەر جەدەل جاردەمدە جاتقان ناۋقاستى توناپ كەتتى

فوتو: ۆيدەودان سكرين

الماتىدا مەديتسينا قىزمەتكەرى جەدەل جاردەم كولىگىندە ەس-ءتۇسسىز جاتقان ناۋقاستى جارتى ميلليون تەڭگەگە توناپ كەتتى. بۇل تۋرالى qandastar.kz اقپارات اگەنتتىگى Almaty.tv ارناسىنا سىلتەمە جاساپ حابارلايدى.

دەنساۋلىعى ناشارلاعان ايەل شۇعىل تۇردە اۋرۋحاناعا جەتكىزىلدى. سوندا ناۋقاستىڭ ۇلى اناسىنىڭ موينىندا قۇنى 500 مىڭ تەڭگە تۇراتىن التىن القانىڭ جوعىن بايقاعان. ول پوليتسياعا ارىز جازعان. ءتارتىپ ساقشىلارى جەدەل جاردەم كولىگىندەگى بەينەكامەرانى تەكسەرگەندە ناۋقاستىڭ موينىنداعى القانى فەلدشەردىڭ شەشىپ جاتقانىن كورگەن.

مەديتسينا قىزمەتكەرى جانىندا ادامداردىڭ جوقتىعىن پايدالانىپ التىن العانى شەشىپ الىپ, ونى لومباردقا وتكىزىپ جىبەرگەن.

سوڭعى اقپاراتتارعا سەنسەك, ناۋقاستىڭ قازىرگى جاعدايى جاقسى. ۇرلانعان القا دا يەسىنە قايتارىلدى. ال ۇرلىق جاساعان فەلدشەر شۇعىل تۇردە جۇمىستان شىعارىلدى.

“اتالعان فاكتى بويىنشا تۇركسىب اۋداندىق ىشكى ىستەر ءبولىمى قىلمىستىق كودەكستىڭ 188-بابى 1-بولىگىنە سايكەس (ۇرلىق) سوتقا دەيىنگى تەرگەۋ امالدارىن باستادى. سول كۇنى فەلدشەر ۇستالىپ, بەينەجازبا تاركىلەنىپ, سوتقا دەيىنگى تەرگەۋ امالدارى جۇرگىزىلدى”, – دەدى تۇركسىب اۋدانى پروكۋراتۋراسىنىڭ ءبولىم باستىعى ادلەت قۋاندىقوۆ.

بۇعان دەيىن الماتى وبلىسىندا ايەلدى بۇرىنعى كۇيەۋى ۇرلاپ كەتىپ, ۇرىپ-سوققانى تۋرالى جازعان ەدىك.