جاڭالىقتار
الماتىدا حالىقارالىق تسيفرلىق فورۋم وتەدى
فوتو: اشىق دەرەككوز
الماتىدا 2025 جىلدىڭ 31 قاڭتارى مەن 1 اقپانى ارالىعىندا Digital Almaty 2025: «Industrial AI: جاڭا داۋىرگە ارنالعان تەحنولوگيالار» اتتى حالىقارالىق تسيفرلىق فورۋمى وتەدى, دەپ جازدى qandastar.kz
جەتەكشى حالىقارالىق الاڭدا ەاەو ەلدەرىنىڭ يننوۆاتسيالىق دامۋ كەلەشەگى مەن تسيفرلىق كۇن ءتارتىبىن تالقىلاۋ ءۇشىن ەاەو ەلدەرىنىڭ مەملەكەتتىك قايراتكەرلەرى, جەتەكشى ساراپشىلار مەن كاسىپكەرلەر باس قوسادى. VII فورۋم اياسىندا Industry 4.0 AI Battle – جاساندى ينتەللەكت سالاسىندا ۇزدىك ستارتاپ ءۇشىن اۋقىمدى سايىس, ءىت-ەكوجۇيە سالاسىنداعى جوبالار تۋرالى تاجىريبە الماسىپ, اقپاراتتى بولىسەتىن ءىرى قازاقستاندىق جەر قويناۋىن پايدالانۋشىلار, ونەركاسىپتىك ستارتاپتار, تەحنوپاركتەر, تەحنولوگيالىق كومپانيالاردىڭ كورمەسى جوسپارلانعان.
Digital Almaty-2025 ونەركاسىپتەگى تۇبەگەيلى وزگەرىستەر مەن جاساندى ينتەللەكتىڭ جاھاندىق يندۋستريا كەلەشەگىنە ىقپالىنا ارنالادى. قازىرگى كەزدە ءاى تەحنولوگيالارى وندىرىستىك پروتسەستەردىڭ تيىمدىلىگى, قاۋىپسىزدىگى جانە تۇراقتىلىعىنىڭ نەگىزگى درايۆەرىنە اينالىپ كەلەدى. Industrial AI الەۋەتىن كۇردەلى وندىرىستىك تىزبەكتەردى اۆتوماتتاندىرۋ, بولجاۋ جانە وڭتايلاندىرۋ ءۇشىن قولدانۋ ونەركاسىپ سەكتورىن ينتەللەكتۋالدى باسقارۋدا جاڭا مۇمكىندىكتەردى اشادى. تسيفرلىق الەممەن تانىستىراتىن ەكىكۇندىك شاراعا 40 مىڭنان اسا ادام قاتىسادى دەپ كۇتىلۋدە.
«VII Digital Almaty جاساندى ينتەللەكتتى ونەركاسىپتىك ەكوجۇيەلەرگە; ەكونوميكا مەن قارجىعا; ESG-گە; مەديتسيناعا, بىلىمگە جانە كيبەرقاۋىپسىزدىككە ينتەگراتسيالاۋ تاقىرىپتارىن اشاتىن اۋقىمدى ىسكەرلىك باعدارلامانى ۇسىنادى. ياعني, فورۋم الاڭىندا «اقىلدى» فابريكالاردى دامىتۋدى, Industry 4.0 شەڭبەرىندە جاڭعىرتۋ مەن اۆتوماتتاندىرۋدى قوسا العاندا, وندىرىستەردى ترانسفورماتسيالاۋعا بولاتىن AI-شەشىمدەر ۇسىنىلاتىن بولادى», – دەدى تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى جاسلان ماديەۆ.
الەمدىك ساراپشىلار مويىنداعان Digital Almaty وتكەن جىلى ءوز الاڭىندا 300-دەن استام سپيكەردىڭ باسىن قوستى. باسقا مەملەكەتتەر تاراپىنان ەلىمىزدىڭ تسيفرلىق شەشىمدەرىنە ايتارلىقتاي قىزىعۋشىلىق بار. بۇعان شەت ەلدەردەن 70-كە جۋىق ساراپشىنىڭ, ونىڭ ىشىندە بىرقاتار مەملەكەتتىڭ تسيفرلاندىرۋ مينيسترلەرى كەلىپ, پانەلدىك پىكىرتالاستارعا قاتىسۋى دالەل. ءىس-شارا قوناقتارىنا ارنالعان پىكىرتالاس الاڭدارىمەن قاتار 230-عا جۋىق وتاندىق جانە حالىقارالىق IT-كومپانيالاردىڭ, سونداي-اق تسيفرلاندىرۋ بويىنشا جەتەكشى حالىقارالىق ساراپشىلاردىڭ تسيفرلىق جوبالارى ۇسىنىلعان كورمە جۇمىس ىستەدى.
Digital Almaty-2024 الاڭى سەرىكتەستىكتى العا قويۋ جانە تسيفرلاندىرۋ سالاسىندا تاجىريبە الماسۋ ءۇشىن زور مۇمكىندىك بولدى. مۇندا B2B فورماتىندا 60-قا جۋىق كەزدەسۋ جانە جەر قويناۋىن پايدالانۋشىلار مەن ستارتاپتار اراسىندا 50-دەن استام پيتچينگ ءوتتى.
فورۋمنىڭ ءۇش كۇنىندە بارى 30-عا جۋىق مەموراندۋمعا قول قويىلدى. Freedom Holding Corp. حالىقارالىق ارالدى قۇتقارۋ قورىنىڭ اتقارۋشى ديرەكتسياسىمەن مەموراندۋمعا قول قويدى. فورۋم بارىسىندا تيمۋر تۋرلوۆ «ارال تەڭىزىن قولداۋعا ارنالعان ەكو-كارتا» جوباسىن ۇسىندى. جوبانىڭ نەگىزگى يدەياسى – جويىلىپ بارا جاتقان تەڭىزدى قۇتقارۋ قورىنا 10 پايىزدىق كەشبەك اۋدارىپ وتىرۋ.
فورۋمنىڭ سوڭعى كۇنى Digital Almaty-2024 الاڭىندا جالپى جۇلدە قورى $180 000 بولاتىن ەڭ اۋقىمدى Industry 4.0 Startup Battle ءوتتى. فينالعا 200 وتىنىم ىشىنەن 30 ستارتاپ ءوتتى. ولار باتتل سەرىكتەستەرىنىڭ جۇلدەلى ماراپاتتارى ءۇشىن باق سىناستى. ۇزدىك جوبالاردى مەملەكەتتىك ورگاندار, ۆەنچۋرلىك ينۆەستورلار, ترەكەرلەر, سونداي-اق جەر قويناۋىن پايدالانۋشىلار (KazPetrol, Kusto Group, KazMinerals, Karachaganak Petroleum) اراسىنان كاسىبي ماماندار تاڭداپ, قازىلىق ەتتى.
ەسكە سالا كەتەيىك, Digital Almaty ۇيىمداستىرۋشىلارى: قازاقستان رەسپۋبليكاسىنىڭ تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى, قازاقستان رەسپۋبليكاسىنىڭ سىرتقى ىستەر مينيسترلىگى, الماتى قالاسىنىڭ اكىمدىگى جانە «يننوۆاتسيالىق تەحنولوگيالار پاركى» دەربەس كلاستەرلىك قورى.
