الماتىدا قارۋ ساتقان پوليتسەيلەر سوتتالدى

الماتى قالاسىندا پوليتسيانىڭ ءۇش قىزمەتكەرىنە ۇكىم شىقتى. ولاردى قارۋ مەن وق-دارىلەردى ۇرلادى دەپ ايىپتاعان, دەپ حابارلادى qandastar.kz Massaget.kz-كە سىلتەمە جاساپ.

ءىس بوستاندىق اۋداندىق سوتىندا قارالدى.

بەلگىلى بولعانداي, الماتى قالالىق پوليتسيا دەپارتامەنتىنىڭ قىزمەتكەرلەرى ەسەپتەن شىعارىلعان قارۋلاردى ۇرلاپ, ولاردى زاڭسىز ساتقان. سوت ۇكىمىنە سايكەس, بۇل قىلمىستىق سحەماعا تىل باسقارماسىنا قاراستى اسكەري جانە ارنايى قامتاماسىز ەتۋ ءبولىمىنىڭ اعا ينسپەكتورى م.ج., پوليتسيا دەپارتامەنتىنىڭ كريميناليستى م.ش. جانە جۇرگىزۋشى ن.ا. قاتىسقان. ولار جويۋعا ارنالعان قارۋدى جۇيەلى تۇردە ۇرلاپ, ساتقان دەپ تانىلدى.

قارا نارىققا قارۋ قالاي تۇسكەن?

تەرگەۋ بارىسىندا انىقتالعانداي, تىل باسقارماسىنا قاراستى ءبولىمنىڭ اعا ينسپەكتورى سوت ىستەرى بويىنشا ايعاق زات رەتىندە ساقتالعان نەمەسە تاركىلەنگەن اتىس قارۋلارىن الدىمەن زاڭدى تۇردە ەسەپتەن شىعارعان. جويىلۋى ءتيىس قارۋلار شىن مانىندە ۇرلانعان. قالعان ەكى ارىپتەسى (ەكەۋى دە پد قىزمەتكەرلەرى) بۇل قارۋلاردىڭ زاۋىتتىق نومىرلەرىن جويىپ, بوياپ نەمەسە وزگەرتىپ, ساتقان. كەيىن پوليتسيا قىزمەتكەرى ولار جويىلدى دەگەن جالعان اقپاراتتى رەسمي تىركەۋلەرگە ەنگىزىپ وتىرعان.

ولار بارلىعى 50-گە جۋىق قارۋدى ۇرلاپ ۇلگەرگەن. ونىڭ ىشىندە كالاشنيكوۆ اۆتوماتى, مىلتىق, ماكاروۆ تاپانشالارى, گراناتالار مەن ءارتۇرلى كاليبردەگى وق-دارىلەر بولعان.

بوستاندىق اۋداندىق سوتىنىڭ ۇكىمىمەن ءۇش ايىپتالۋشى دا جۇيەلى تۇردە قارۋ ۇرلاپ, ساتۋ ءىسى بويىنشا كىنالى دەپ تانىلدى. سحەمانىڭ ۇيىمداستىرۋشىسى — پوليتسيا دەپارتامەنتىنىڭ اعا ينسپەكتورى م.ج. 8 جىلعا, كريميناليست — 5,5 جىلعا, جۇرگىزۋشى — 7 جىلعا باس بوستاندىعىنان ايىرىلدى.

 «قىزمەتتىك وكىلەتتىكتەرىن پايدالانىپ, ولار بىرنەشە مارتە الدىن الا ءسوز بايلاسۋ ارقىلى اتىس قارۋى مەن وق-دارىلەردى ۇرلاعان. بۇل قارۋلار ايعاق زات رەتىندە ارنايى قويماعا تاپسىرىلعان. ولار بۇل قارۋلاردى زاڭسىز اينالىمعا شىعارعان, قوعامدىق قاۋىپسىزدىك پەن تارتىپكە قارسى ارەكەتتەر جاساعان, سونداي-اق مەملەكەتتىك قىزمەت پەن باسقارۋ مۇددەسىنە قارسى اۋىر قىلمىستار جاساعان», – دەلىنگەن سوت ۇكىمىندە.

پوليتسەيلەر ارنايى شەندەرىنەن ايىرىلىپ, ەكەۋىنە مەملەكەتتىك قىزمەتتە ءومىر بويى جۇمىس ىستەۋگە تىيىم سالىندى.

ايتا كەتەيىك, 2024 جىلدىڭ اقپانىندا جەلىدە الماتى قالالىق پوليتسيا دەپارتامەنتىندە 2022 جىلعى قاڭتار وقيعالارىنا بايلانىستى تاركىلەنگەن قارۋلاردىڭ جوعالعانى تۋرالى اقپارات تاراعان. سول كەزدە پوليتسيا قارۋ-جاراقتىڭ جەتىسپەۋشىلىگى 2023 جىلى قوزعالعان قىلمىستىق ىستەر مەن حالىقتان ساتىپ الىنعان قارۋلارعا قاتىستى تەكسەرۋ كەزىندە انىقتالعانىن مالىمدەگەن.

الماتى قالالىق پوليتسيا دەپارتامەنتىنىڭ باسشىلارى قىزمەتتەرىنەن بوساتىلدى