جاڭالىقتار
الماتىدا كاسىپكەر LEGO برەندىنىڭ اتىن جامىلىپ, بالالارعا قاۋىپتى ويىنشىق ساتقان
- فوتو: gov.kz
الماتىدا كاسىپكەر «LEGO» تاۋار بەلگىسىن زاڭسىز پايدالانىپ, كونترافاكتىلىك ءونىم ساتقان. بۇل تۋرالى Stan.kz اقپارات اگەنتتىگى حابارلايدى.
«Lego Juris A/S» كومپانياسى وكىلىنىڭ ءوتىنىشى بويىنشا الماتىداعى كوتەرمە ساۋدا بازارلارىنىڭ بىرىندەگى كاسىپكەردىڭ دۇكەنىندە جوسپاردان تىس تەكسەرۋ جۇرگىزىلدى. تەكسەرۋ بارىسىندا كاسىپكەردىڭ بالالارعا ارنالعان ويىنشىقتاردا «LEGO» تاۋار بەلگىسىن زاڭسىز پايدالانعانى انىقتالدى.
«ناتيجەسىندە 4 ميلليون تەڭگەدەن استام سوماعا 3 145 كونترافاكتىلىك ءونىم تاركىلەندى. بۇل ويىنشىقتار زياتكەرلىك مەنشىك قۇقىعىن بۇزىپ قانا قويماي, بالالاردىڭ دەنساۋلىعىنا ۇلكەن قاۋىپ توندىرەدى. كونترافاكتىلىك ويىنشىقتاردا قاۋىپتى حيميالىق زاتتاردىڭ بولۋى جانە ساپاسىز ماتەريالداردان جاسالۋى مۇمكىندىگى زور. بۇل بالالاردىڭ دەنساۋلىعى مەن قاۋىپسىزدىگىنە اۋىر زارداپتار اكەلۋى مۇمكىن», — دەلىنگەن ادىلەت مينيسترلىگىنىڭ حابارلاماسىندا.
قازىر كىنالى تۇلعانى اكىمشىلىك جاۋاپكەرشىلىككە تارتۋ بويىنشا ءىس جۇرگىزۋ شارالارى قابىلدانۋدا. ءىستىڭ ماتەريالدارى كۇدىكتىنى ودان ءارى جاۋاپقا تارتۋ ءۇشىن سوتقا جىبەرىلەدى
