الماتىدا كاسىپكەرلەردىڭ زارەسىن العان قىلمىستىق توپ ۇستالدى

فوتو: اشىق دەرەككوز

ىشكى ىستەر مينيسترلىگى كريميناليتەتتىڭ بيزنەسكە قىسىم كورسەتۋ فاكتىلەرىن انىقتاۋ جانە جولىن كەسۋ بويىنشا جۇيەلى جۇمىستى جالعاستىرۋدا, دەپ جازدى qandastar.kz

جەدەل ءىس-شارالاردىڭ ناتيجەسىندە الماتى قالاسىندا ۇيىمداسقان قىلمىسقا قارسى كۇرەس باسقارماسىنىڭ قىزمەتكەرلەرى ۇقكد-مەن بىرلەسىپ, پروكۋراتۋرانىڭ ۇيلەستىرۋىمەن رەسمي ەمەس جۇمىسكەرلەرى قىلمىستىق ورتانىڭ وكىلدەرى بولعان كۇزەت ۇيىمىنىڭ قۇقىققا قارسى قىزمەتىن جويدى.

ولار قاقتىعىس جاعدايلار مەن ارانداتۋ ارقىلى وبەكتىلەردى باسىپ الۋمەن اينالىسقان. كەيىننەن ولاردىڭ «قاۋىپسىزدىگىن» قامتاماسىز ەتكەن. مىسالى, وتكەن جىلدىڭ 23 قاراشاسىندا فيگۋرانتتار كريمينالدىق قامقورلىق جاساۋ جانە ىقپال ەتۋ سالاسىن كەڭەيتۋ ماقساتىندا كاراوكە-بارعا باسىپ كىرىپ, وندا مەكەمەنىڭ يەسى مەن كۇزەتشىلەرىن ۇرىپ-سوققان.

– پوليتسياعا 10 كۇدىكتى جەتكىزىلىپ, ولاردىڭ التاۋى قاماۋعا الىندى. 20-دان استام ىزدەۋ ءىس-شاراسى جۇرگىزىلىپ, اتىس جانە سۋىق قارۋ تاركىلەندى. بۇزاقىلىق پەن ءوز بەتىنشە بيلىك ەتۋدىڭ بىرنەشە فاكتىسى بويىنشا سوتقا دەيىنگى تەرگەپ-تەكسەرۋ جۇرگىزىلۋدە. كۇدىكتىلەردىڭ وسىعان ۇقساس باسقا دا قىلمىستارعا قاتىسى بار-جوعى تەكسەرىلۋدە. اتالعان باعىتتاعى جۇمىس جالعاسۋدا, – دەدى ءىىم ۇيىمداسقان قىلمىسقا قارسى كۇرەس دەپارتامەنتىنىڭ وكىلى قۋاندىق الپىس.