الماتىدا كۇزەتشىنى سوققىعا جىققان ەر ادام قولعا ءتۇستى

فوتو:ۆيدەو سكرينشوت

الماتىدا تۇرعىن ءۇي كەشەنىنىڭ اۋلاسىندا كۇزەتشىنى سوققىعا جىققان ەر ادام قولعا ءتۇستى. وقيعا بوستاندىق اۋدانىنداعى كوپقاباتتى ءۇي اۋلاسىندا بولعان, دەپ حابارلايدى qandastar.kz

كۋاگەرلەردىڭ ايتۋىنشا, جۇرگىزۋشى شلاگباۋمنىڭ اشىلۋىن ۇزاق كۇتكەن. بىرنەشە رەت سيگنال بەرگەننەن كەيىن, كۇزەتشى وعان سابىر ساقتاۋدى ءوتىنىپ, ەسكەرتۋ جاساعان. الايدا بۇل قاراپايىم ەسكەرتۋ كۇتپەگەن جەردەن جانجالعا ۇلاسىپ, جۇرگىزۋشى كۇزەتشىگە جۇدىرىق الا جۇگىرگەن.

اتالعان وقيعاعا قاتىستى الماتى قالالىق پوليتسيا دەپارتامەنتى رەسمي تۇسىنىكتەمە بەردى.

بوستاندىق اۋداندىق پوليتسيا باسقارماسى «ۇرىپ-سوعۋ» فاكتىسى بويىنشا قىلمىستىق ءىس قوزعادى. كۇدىكتى ۇستالىپ, پوليتسيا بولىمشەسىنە جەتكىزىلدى. قازىرگى ۋاقىتتا تەرگەۋ اياسىندا ءىس جان-جاقتى, تولىق ءارى وبەكتيۆتى قارالۋى ءۇشىن كەشەندى شارالار جۇرگىزىلۋدە, — دەدى قالالىق پد رەسمي وكىلى سالتانات ازىربەك.

وقيعا قوعام نازارىنان تىس قالمادى. الەۋمەتتىك جەلىلەردە كوپشىلىك كۇزەتشىنىڭ ارەكەتىن سابىرلى ءارى كاسىبي دەپ باعالاپ, جۇرگىزۋشىنىڭ ارەكەتىن قاتاڭ سىنعا الدى. پىكىر جازۋشىلاردىڭ باسىم بولىگى مۇنداي ارەكەتتەرگە قاتاڭ جازا قولدانۋ كەرەك دەپ ەسەپتەيدى.

ايتا كەتەيىك, قر قىلمىستىق كودەكسىنىڭ 140-بابىنا سايكەس, «ۇرىپ-سوعۋ نەمەسە دەنساۋلىققا جەڭىل زيان كەلتىرۋ» فاكتىسى بويىنشا كىنالى تۇلعاعا ايىپپۇل سالۋ, تۇزەۋ جۇمىستارى نەمەسە باس بوستاندىعىن شەكتەۋ سەكىلدى جازالار قاراستىرىلعان. تەرگەۋ ناتيجەسىنە قاراي ناقتى جازا ءتۇرى انىقتالاتىن بولادى.