الماتىدا «قىرمانبايدىڭ تويى» دۇركىرەپ ءوتتى

كەشە اكەم تەاتردا ءتوي ءوتتى. دۇركىرەپ ءوتتى. ولاي دەيتىن دە سەبەبىمىز بار. تەاتر كورەرمەندەرى قويىلىم بىتكەنشە كۇلكىگە قارىق بولسا, قويىلىم سوڭىندا شەكسىز قوشامەتىن ءبىلدىردى. زال لىق تولى. كورەرمەن «تويدان» قايتقىسى جوق…

بۇل م.اۋەزوۆ اتىنداعى قازاق مەملەكەتتىك اكادەميالىق دراما تەاترىنىڭ ساحناسىنا اراعا 5 جىل سالىپ قايتا ورالعان «بەس بويداققا ءبىر توي» قويىلىمنان كورگەنىمىز. تىنىمباي نۇرماعانبەتوۆتىڭ كومەدياسىن زاماناۋي نۇسقادا قايتا الىپ شىققان تەاتر ۇجىمى كوپشىلىكتى كۇلدىرە وتىرىپ ويلاندىردى, تولعاندىردى. قىرمانباي وبرازى ارقىلى اتا-انا قادىرى, بالا ءۇشىن جان پيدا اكە ءومىرى جاستارعا وزگەشە وي تاستادى. تۋرا وسى اكەم تەاترداعى «وتىز ۇلىڭ بولعانشانىڭ» كەرى… بەس بالا ءۇشىن ءبارىن ىستەۋگە دايىن اكەگە «كەمپىرىنىڭ» دە ورنى ەرەك ەكەنى جەتكىزىلدى. ارينە, كۇلكى, ءازىل تىلىندە. قويۋشى رەجيسسەرى جانە ولەڭدەرىن جازعان – ابۋباكىر راحيموۆ

كورنەكتى جازۋشى-دراماتۋرگ ت.نۇرماعامبەتوۆتىڭ «بەس بويداققا ءبىر توي» كومەدياسى ۇلتىمىز ءۇشىن ماڭىزىن جويمايتىن ۇرپاق تاعدىرى مەن ونىڭ بولاشاعى ماسەلەسىن كۇلكى پريزماسىنان قاراستىرادى. بەس بويداق – قىرمانباي شال جانە ونىڭ ۇلدارى. جەر ورتاسىنان اۋعاندا كەمپىرى دۇنيە سالعان قىرمانباي ۇلدارىنىڭ تۇرمىس-تىنىس تىرشىلىگىنە  قارنى اشادى, سوندىقتان ءوز اۋلەتىنىڭ ەرتەڭىنە الاڭداۋلى بولسا, ۇلدارى اكەسىن ۇيلەندىرمەككە الەك.

بۇگىنگى كۇن ماسەلەسىن ۇلتتىق دۇنيەتانىم تۇرعىسىنان قاراستىراتىن, ازىلگە تولى قويىلىمدا اسەم ءان مەن قازاقى قالجىڭدار جالپى اتموسفەرانى جانداندىرا تۇسەدى.

سۋرەتشى – ە.ادىسبەك, مۋزىكاسىن وڭدەگەن – د.كادەن, بيلەرىن قويعان – گ.مۇحامەدجانوۆا, رەجيسسەردىڭ اسسيستەنتى جانە قۇرمانباي رولىندە – ب.تۇرىس.

كىم, نەگە كۇلدى? جۇرت نەگە ك ۇلىپ وتىرىپ, «توي» ۇستىندە ويعا باتتى? بۇل سۇراقتىڭ جاۋابىن بىلگىڭىز كەلسە نەمەسە قارت قۇرمانبايدىڭ تويىن ءوز كوزىڭىزبەن كورگىڭىز كەلسە, ءبىر ءۇيلى جاننىڭ ءبىر ساتتەگى تويىنا كۋا بولعىڭىز كەلسە 29 قاراشا كۇنى دە م.اۋەزوۆ تەاترىنا بارىپ تاماشالاساڭىزدار بولادى!

قۇرمەتوللا مۇحامەتحان ۇلى

«قانداستار» ءۇشىن