جاڭالىقتار
الماتىدا مارافوننىڭ ەكى قاتىسۋشىسى كوز جۇمدى
فوتو: Pixabay.com
20 ساۋىردە Almaty Half Marathon-دا 84 جاستاعى اققويان رساليەۆ پەن 21 جاستاعى نۇربول احمادي كوز جۇمدى. ەكەۋى دە جارتىلاي مارافوندا (21,1 شاقىرىم) جۇگىرىپ ءوتتى. ولار الماتىداعى جارىستاردىڭ تۇراقتى قاتىسۋشىلارى ەدى, دەپ جازدى qandastar.kz. stan.jz-كە سىلتەمە جاساپ
جارتىلاي مارافون تاڭەرتەڭ تۇڭعىش پرەزيدەنت ساياباعىنان ورتالىق ستاديونعا دەيىنگى باعىت بويىنشا ءوتتى. ۇيىمداستىرۋشىلار ەرەجەگە ساي ارەكەت ەتىپ, مەديتسينالىق قىزمەت, توتەنشە جاعدايلار قىزمەتى جانە پوليتسيا بولعانىن ايتادى.
اققويان رساليەۆ 2021 جىلدان بەرى جارىستارعا تۇراقتى تۇردە قاتىسىپ كەلەدى. بۇعان دەيىن الماتى جارتىلاي مارافونى مەن الماتى مارافونىندا 21,1 شاقىرىم جانە 10 شاقىرىم قاشىقتىقتى ءساتتى باعىندىرعان.
20 ساۋىردە جارتىلاي مارافون كەزىندە ءال-فارابي داڭعىلىنداعى قاشىقتىقتىڭ ءبىرىنشى شاقىرىمىندا ەر ادام كەنەتتەن ءوزىن ناشار سەزىندى. ءبىر مينۋتتان كەيىن وعان جەدەل جاردەم كەلگەن, بىراق جۇرەك سوعىسى بولعان جوق.
«ساعات 08:15-تە پوليتسيا قىزمەتكەرلەرى قاتىسۋشىنىڭ قۇلاپ قالعانىن حابارلادى. ءبىر مينۋت ىشىندە جەدەل جاردەم كەلدى. حاتتاماعا سايكەس رەانيماتسيالىق شارالار جۇرگىزىلدى. الدىن الا قورىتىندى بويىنشا ارتەريانىڭ ترومبوەمبولياسى دياگنوزى قويىلدى. سوزىلمالى ارتەريالىق گيپەرتەنزيا بولعان», – دەدى بريگادا دارىگەرى الىبەك قوجانازاروۆ.
مارافوننىڭ ەكىنشى قاتىسۋشىسى نۇربول احمادي بۇعان دەيىن 2025 جىلعى قىسقى جۇگىرۋدە 10 شاقىرىمدىق جارىسقا قاتىسىپ, استانا مەن الماتىداعى جارتىلاي مارافونعا, سونداي-اق الماتىداعى مارافونعا تىركەلگەن.
20 ساۋىردە الماتىدا 16 شاقىرىمدىق جارتىلاي مارافون كەزىندە ول ەسىنەن تانىپ قالدى.
«ساعات 09:18-دە كەلگەن كەزدە ۇيقى ارتەرياسىندا پۋلس جوق, تىنىس المايدى, قان قىسىمى ءنول بولدى. رەانيماتسيالىق شارالار حاتتاما بويىنشا جۇرگىزىلدى. ءساتسىز. ءولىم 103 بريگاداسى كەلگەنگە دەيىن بولعان. الدىن الا دياگنوز – جەدەل جۇرەك جەتكىلىكسىزدىگى», – دەپ ءتۇسىندىردى دارىگەر.
دارىگەرلەردىڭ ايتۋىنشا, قاتىسۋشىلاردىڭ ءولىمىنىڭ سەبەبى سوت-مەديتسينالىق ساراپتامانىڭ قورىتىندىسى بويىنشا بەلگىلى بولادى.
«سمەلوست بىت پەرۆىم» كورپوراتيۆتىك قورىنىڭ اتقارۋشى ديرەكتورى سالتانات قازىباەۆانىڭ ايتۋىنشا, قاتىسۋشىلاردىڭ قاۋىپسىزدىگى ءبىرىنشى ورىندا.
«جارىسقا تىركەلۋ كەزىندە بارلىق قاتىسۋشى سپورتتىق ءىس-شاراعا قاتىسۋعا فيزيكالىق دايىن ەكەنىن جانە ءوز دەنساۋلىعىنا تولىق جاۋاپتى ەكەنى تۋرالى قولحاتقا قول قويادى, بۇل – مۇنداي مارافونداردى وتكىزۋدە الەمدە قابىلدانعان تاجىريبە. الماتى مارافونىنا قاتىسۋشىلار ءۇشىن جىل بويىنا ءبىز تۇراقتى تۇردە تەگىن اشىق جاتتىعۋلار مەن ساراپشىلارمەن دارىستەر وتكىزىپ تۇرامىز», – دەپ قوستى سالتانات قازىباەۆا.
ايتا كەتەيىك, بۇعان دەيىن مارافوندا جۇلدەلى ورىنعا يە بولعان72 جاستاعى قاريانىڭ ءبيى جەلىدە تالقىعا تۇسكەن ەدى.
