Almatyda samsanyń arasynan tiri tyshqan shyqty

Almatyda túsirilgen beınejazba áleýmettik jelilerde úlken daý týdyrdy. Kadrlarda kóshede satylyp turǵan samsanyń arasynda tiri tyshqan júrgeni anyq kórinedi. Vıdeonyń astyna qaldyrylǵan pikirlerden-aq turǵyndardyń ashýy men jıirkenishin baıqaýǵa bolady, dep habarlaıdy Qandastar.kz Skifnews.kz aqparat portalyna silteme jasap.

Kýágerlerdiń aıtýynsha, mundaı jaǵdaılar qoǵamdyq tamaqtaný oryndarynda jıilep ketken.

Pikir qaldyrǵandardyń biri: «Kóshedegi samsalardyń 80 paıyzy gıgıenaǵa saı emes. Tazalyqtan góri aqsha mańyzdyraq», – dep jazdy. Taǵy biri: «Osy jerdiń turaqty klıenti sııaqty jep jatyr», – dep ájýalady.

Jeli qoldanýshylary sanıtarlyq-epıdemıologııalyq baqylaý organdaryn dereý shara qoldanýǵa shaqyryp jatyr. Olar mundaı oryndarda tekseris kúsheıtilip, halyqtyń densaýlyǵyna qaýip tóndiretin jaǵdaılarǵa jol bermeýdi talap etýde.

Bul oqıǵa kóshede satylatyn tamaq ónimderine qatysty qoǵamdaǵy senimsizdikti kúsheıtti. Sarapshylar mundaı beıbereket jaǵdaılar jalǵasa berse, tamaqtan ýlaný men túrli indetterdiń taralý qaýpi artatynyn eskertedi.