جاڭالىقتار
الماتىدا سەيسمولوگيالىق زەرتتەۋ جۇرگىزىلەدى
الماتى اۋماعىنا ارنايى سەيسمولوگيالىق زەرتتەۋ جۇرگىزىلەدى. پرەزيدەنت قاسىم-جومارت توقاەۆ عىلىم جانە تەحنولوگيالار جونىندەگى ۇلتتىق كەڭەستىڭ وتىرىسىندا وسىلاي دەدى. اكىمدىك بۇل باعىتقا 3 جىلدىق زەرتتەۋ جۇمىستارىنا قارجى بولەدى. سونداي-اق تارازداعى گيدرومەليوراتيۆتىك قۇرىلىس ينستيتۋتى قايتا قالپىنا كەلتىرىلىپ, ماتەريالدىق-تەحنيكالىق تۇرعىدان تولىق جابدىقتالادى. مەملەكەت باسشىسى سەيسمولوگيا ينستيتۋتىنىڭ جاعدايى دا ءماز ەمەس ەكەنىن ايتتى. ۇكىمەتكە وسى ينستيتۋتتىڭ عىلىمي الەۋەتىن ارتتىرۋعا قاتىستى ناقتى ۇسىنىستار دايىنداۋدى تاپسىردى. قاسىم-جومارت توقاەۆ, قازاقستان رەسپۋبليكاسىنىڭ پرەزيدەنتى: — تاعى دا قايتالاپ ايتقىم كەلەدى, مەملەكەتتىك ورگاندار بارلىق ىستە, ەڭ الدىمەن, ساپالى عىلىمي قورىتىندىعا سۇيەنۋى كەرەك. بۇل – وتە ماڭىزدى مىندەت. شەشىمدەر ابدەن پىسىقتالىپ, ناقتى نەگىزدەلىپ بارىپ, قابىلدانۋعا ءتيىس. تالداۋ جۇرگىزىپ, احۋالدى بولجاۋ ءۇشىن عالىمداردىڭ قولىندا, زەرتتەۋ ورتالىقتارىندا قاجەتتى قۇرال-جابدىقتار بولۋعا ءتيىس.
